#وەلی دېوانە#
چراغم ئاوان، چراغم ئاوان
سەرزەمین وە زەوق دین تۊ ئاوان
باڵات سەنگەرچەی نەوتۇڵ ساوان
ساوای گوڵستان جەننەتو ئەلماوان
گېسۇت بەڕەزای پەخش پای کاوان
زوڵفت ئەگریجەی باڵ (بەت) ئاوان
یا چۇن چنۇران نە سەرکڵاوان
چابۇکی وازان نە دەور چاوان
دیدەت چۇن دیدەی ئاهۇی بەر تاوان
گۊنات گوڵخونچە جە نۊ شکاوان
لیمۊت گوڵ وەدەم هېمای نەیاوان
نمناکەن وە عەتر شەوبۊی شەتاوان
خاڵ نوختە سۊسەن پای خورەتاوان
من جەو خاڵە دەرد مەجنۇن پېم یاوان
نەمامی نەوخېز نازدارەی باوان
تۊنی شای سۊسەن نەسەر سەراوان
هیچ کەس نەزاکەت نازت نەتاوان
هەر یەک من نەبۊ شای چەم سېیاوان
من وېڵم پەی تۊ سوب تا خۆرئاوان
کاوان، کڵاوان، گشت وە من ئاوان
جەو ساوە وە نېش نیگای تۊ کاوان
شەوان حەرامەن جە دیدەم خاوان
شەو تا ڕۊ چەنی بەخت وېم داوان
جام ها نەسەر فەرق قوللەی کڵاوان
فیدای دیدەت بام شای چەم سېیاوان
ڕەحمێ کەر وەحاڵ بەندەی بېتاوان
[1]