باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و یاڼزەهەمە
دمای پەرسەکا ڕاهیبەکەی(بەخېرا) جە ئەبوتالیبی، ئیتر زاناش ئانە کە ئینا چەنیش، شای لەولاکەن، پەوکەی ڕوەش کەردە محەمەدی و چن پەرسێش وەنە پەرسا، پەرسۍ لاشەی، پەرسۍ ڕۊحی، پی تەرزە:
ڕاهیب حاڵی بیی، شای لەولاک وېشەن
حوکمی ئەوەڵین، وە ئاخەرین وېشەن
ئەم جار، (من الله) سەئەلتوکش وات
پەرسا، جە ئەحواڵ، خواجەی کائینات
غەرەز، جە حەزرەت چن سوئالات کەرد
جە ڕۊح، جە قاڵب، جە دەوا، جە دەرد
جوابش داوە، وە دەوانی دەو
یەک یەک، موتابیق، مەعلووماتی ئەو
دیا، پەی دیڎەی سیای مەخموورش
مەستی قەترانی بۍ سورمەی توورش
جە ئەبوتالیب، پەرسا دیڎەی ئەو
وات: سرمەش زایل مەبۊ، دمای خەو
وات: مەخموور دیڎەش، دایېم خود ڕەنگەن
بۍ مەی مەست و بۍ، سورمە سېوەنگەن
خەیاڵ کەرد پەرێ، ئیتمینان دەردەم
مەهری نبوەت، بوینوو، بە چەم
ڕاهیب، چن لاڵا، سوجدەی ئەدەب بەرد
حەزرەت، هەر مەدام، ئیمتیناع مەکەرد
مەهری نبوەت، تەبخ تەبخی سوور
جە بەینی کەتفەین، شای ئەعلا زهوور
ڕاهیب شەرەفیات، وە میهری خاتەم
هەم بۊسا، دەردەم، هەم ماڵا نە چەم
واتش: مەعلوومەن، قیبلەی یەقینەن
وەڵڵا ڕەحمەتەن، للعالەمینەن
بزورگی بۍ عەیب، عەزیمولشانەن
یەقین پېخامبەر، ئاخر زەمانەن
خاتەمولئەنبیا، موختار ڕەسولەن
دوعاش گرد جە لای، خوڎا قەبووڵەن
ڕۊی مەحشەر شافېع، گوناهبارانەن
سەرداری زومرەی، گرد سەردارانەن
وە خاشاکی پاش، عالەم موحتاجەن
ئەختاری مەنزڵ، تەختی مېعراجەن
مەخلووق گرد پەرێش، موسەخەر مەبۊ
عالەم ئوممەتی، پېغەمبەر، مەبۊ.[1]