$مەرگی عومەر ڕەزا چیمان پێدەڵێت$
#ئیدریس مستەفا#
دەنگی کوردی ڕادیۆی بەغدا و سنە و ستۆدیۆکانی کرماشان و تاران کە گۆرانی کوردیان لێ تۆمار دەکرا لە سەدەی ڕابردوودا بوونە هۆی لە دایکبوونی یاخود بڵێم بونەهۆی نەمردنی چەندان دەنگخۆش و گۆرانیبێژی و هونەرمەندی کورد. عومە ڕەزا یەکێک بوو لەو گۆرانی بێژانەی لە ڕادیۆی دەنگی بەغدا چەند گۆرانیەکیان بۆ تۆمارکرد و ئەمێستاکەش تام و چێژی خۆی نەک هەر لە دەستداوە بەڵکوو تامەزرۆتر دەبین بۆی کاتێک دەبینین لە سایەی حوکمی کوردیدا هونەر و ڕەسەنێتی مانایەکیان نەماوە و ئەوانەشی ئەو خزمەتەیان کردووە لە تاو بێ مانایی ئەم دەورەیەدا کز و کەساس لێی دانیشتوون وەک وێنەکەی عومەر ڕەزا. ئەوانەشی دەنگی ڕەسەن و هونەریان هەیە ناتوانن یاخود ناهێڵن بە دیار بکەون. ڕەسەنێتی ئەو گۆرانی و کارە هونەریانەی کە لەوێوە تۆماردەکران و پەخش دەکران بە نەمری ماونەتەوە تاکو ئەمڕۆکە. خەڵک هەبوون لەو دەمانەدا ڕەخنە، تانە و تەشەر یان بێ هەڵوێستی یاخود ئەوانەی لەو دەزگایانەدا کاریان دەکرد و بگرە گۆرانیشیان بگوتایە بە ناپاک یاخود بە ناکورد یان بەعسی لە قەڵەم دەدران گوایە لەژێر دەسەڵاتی بەعس یان شا و ئێستای کۆماری ئیسلامیدا کاردەکەن. بەڵام، ئێستا لەهەر کات زیاتر دەرکەوت ئەوانەی لەو سەردەمەدا کردیان شۆڕشێک بوو لە گۆرانی گوتن و هونەری کوردیدا کە دووبارەبوونەوەیان مەحاڵە. ئەو دەم هیوا و خەون هەبوون، کۆمەڵگەیەک هەبوو پێی دەوترا کوردەواری. لەگەڵ هاتنەوەی حزبی کوردی و دەسەڵاتی کوردیدا ئەو خەون و هیوایانە هەپروون بە هەپروون بوون. ئەو هەڵایسانە هونەری و میوزیکیەی ئێستا لە ڕۆژهەڵاتی کوردستان لە گڕی بەهێزی خۆیدایە گەر دوو سبەی حوکمی کوردی لێ درووست ببێ دەکوژێتەوە و هەر وەک باشووری لێ دێت. دەڵێی چی چارەنووسی ئێمەی کورد واهاتووە کە گەشە و زیندوو ڕاگرتنی ئەدەب و هەنورەکەت لەژێر دەسەڵاتێکی داگیرکەردا باشتر گەشە دەکات و لەژێر دەسەلاتی حوکمە خوماڵیەکەی خۆیدا لە ناودەچێ یاخود نابود دەبێ. لە چەندان بۆنە و پەیوەندیدا بە هاوڕێ و دۆستانی ڕۆژەهەلاتیم گوتووە تا دەتوانن خەریکی بەرهەمی هونەری بن چونکە گەر سبەینێ دەسەڵاتێکی کوردی وەک بەشەکەی لای ئێمەتان بۆ قوت بێتەوە ئەوا هەرچی بەهرە و جوانی و ڕەسەنێتی هونەر هەیە نامێنێ. لە یەکێک لە بۆنەکانی دەرەوە، بە یەکێک لەسەرکردەی دوو حزبە گەورەکەی ڕۆژهەلاتم گوت: ئایا هیچ زەمانەتێک هەیە کە ئێوە لە ڕۆژهەڵات دەسەڵات بگرنە دەست شەڕی یەکتر نەکەن و وڵات بەرەو چارەنووسی وەک باشوور نەبەن؟ وتی: لە سیاستەدا هیچ زەمانەتێک نیە!. [1]
Ev babet bi zimana (کوردیی ناوەڕاست) hatiye nvîsandin, klîk li aykona
bike ji bu vekirina vî babetî bi vî zimana ku pî hatiye nvîsandin!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Ev babet 548 car hatiye dîtin