باسو دەسەڵاتو بارام سانی دوەمی، کوڕو گەنج عەلی سانی کوڕو بارام سانی جە هۆرامان.

وەختێ بارام سانی دوەم هەقەو خەسرەو بەگی کوڕیش ئەسا جە حسێن سانی کوڕو دەروېش بەگی کوڕو حسێن بەگی کوڕو بارام سانی یەکەمی، ئیتر وېش بی بە سان و فەرمانڕەواو هۆرامانی و سەرقاڵو دەسەڵاتداری بۍ.
ماچان سەردەمو بارام سانی دوەمینە، دەگایەکانو (سەرگەتە، گوڵپ، نارنجڵە، ئەحمەڎئاوا، تەوېڵۍ وبېیارۍ، هېڵانپۍ، خارگېڵان) ە و فرەو دەگایەکاو شارەزووریش وستېبېنۍ چېرو دەسەڵاتو وېش.
پەی ماوەو دوۍ یان یەرۍ ساڵا، پی تەرزە دەسەڵاتش بەرد ڕاوە، دمایی میران بەگ کوڕو سەلیم پاشای ئاما بە حیلەو فېڵۍ بارام سانش خەڵەتنا و زنجیر بەڼش کەرد و گرفتارو زیڼانیش کەرد. ڕوێشا ڕەزاسان چاگە ئاماڎەبۊن، چەنی میران بەگی کەرۊش بە جەنگ، چن کەسێ جە پیاکا میران بەگی کۊشیا، جە مېیانو ئاژاولەکېنە بارام سان زیڼانەنە وېش ڕزگار کەرۊن. وەختێ هەواڵ مەیاوۊ لاو سەلیم پاشای، پاشا وېش مێ پەی ناوچەکەی و چەنی بارام سانی پەلامارەو یوترینی مڎان، بە پیسی مەڕیۊو جیامازۊ، بارام سانیچ پېسە جارا ملۊوە سەرو دەسەڵاتو وېش. بارام سانی دوەم بە ڕېککۆت، بە نیازو ڕاوەشکاری مەیاوۊ دەگاو دەرەو مەڕۍ، چەمش مەگنۊ بە یانە وباڵەخانێ سەرو خاکو عەجەمیۆ (ئېران) ، مەپەرسۊ هینۍ کېنۍ؟، ماچان هینۍ شېخێ دەگاو سەرگەتېنۍ، مەپەرسو شېخەکەی کە ئا یانەو عەمارەتە هینۍ تۊنۍ/ ئاڎییچ ماچۊ بەڵۍ هینۍ منەنۍ، بارام سان خېرا سەرو ئەسپەکەیشۆ وەزورەو فەرمانو وېرانکەردەو یانەو عەمارەتەکەیش مڎۊ، جوەو ئاوەکېچش کۊرە کەرۊوە، شېخەکەیچ دارکاری کەرۊن، دمای یەرۍ ساڵا بە سەردایێ ملۊ پەی شارو سنەی، بە مەڵامەتو ئانەی کە وەڵتەر سەرکەشیۍ و یاخیگەریېش کەردېبېنۍ، کەریم خان والی سنەی دارکاریش کەرۊن، ئیبراهیم بەگ خاوەنو دەگاو تەنگیسەری لاڵیۊوە پاشای کە ئازاڎش کەرۊ، والیچ ئازاڎش کەرۊن، دیسان پېسە ڕاوەبەرو کارووبارو هۆرامانی، دەسبەکاربۊن، دماتەر بە پەرداخێ قاوەی زەهرین، زەهر وارد کریۊ، بە هەرحاڵێ بۊن وېش مەیاونۊوە ئاوایی (دوڵاو) ی، چاگە گیان مسپارۊ.[1]