باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و چل و ششەمە
میرزا ئۆلقاڎر چی بەشەنە، باس جە ئیمانئاوەردەو شش نەفەرا کەرۊن جە ئەهلو (مەدینەی) ، کە سەرەتێوە خاسەن پەی گەشەو دینە تازەکەو محەمەدی.
بەڵۍ چوون حەزرەت پاکی پېغەممەر
شەفا خوای ئوممەت ڕووی دەشتی مەحشەر
جە وەقتی حەج عومرەی موکەررەم
مەشیی وە لای قەوم حوجاجی حەرەم
وە هەر قەباییل پەنا مەبەردش
مەتڵەبی وېش ئیزهار مەکەردش
شاید مائزوون بشون وە لاشان
ئەمین بۊ دایېم جە هەواخواشان
جە گشت بابەتێ جە ڕوژگاران
جە شەڕی ئەعدا نیگاش بداران
تا تەبلیغی دین حەقق مەحکەم کەرۊ
ئەمری ڕیسالەت وە جا باوەرۊ
هەر چەن ئیلتیماس مەکەرد ئەندېش
هیچ کام ئەو تەدبیر قبووڵ نەکەرد لېش
واتەن قەومی وېش گرد بە ئەو دانان
ئەوان جە ئېمە خاستەر مەزانان
ئەو ساڵە وېیەرد وە پەڕاگەندە
تا یاوا بە وەقت ساڵی ئاییندە
تاکە خوداوەند سەهل کەرد کارش
ڕەواج دا قوماش مایەی بازارش
جە ئەهلی یەسرېب وە بۍ چوون و چەند
شش نەفەر یانی شش سەعادەتمەند
شین وە زیارەت وە کەعبەی شەریف
کەردشان تەواف مەرتەبەی زەریف.[1]