باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎەمە
حەزرەت ماوەو حۆت ڕوا چاگە ئیستیقامەش کەرد، چەنی ئوسا دیوارەکا و هەرمانکەرەکا خەریکو مزگیەکەی بېنۍ، هاگاش چەنەشا بۍ، کۊچکەرەکۍ و پەشتیوانەکۍ پېوەرە هەرمانە کەرېنۍ.
چوون ئەبو ئەیووب پا نېیا وە پېش
ئەسپابی حەزرەت بەرد بە یانەی وېش
چەو دما حەزرەت (واقیع الغیوب)
بە موددەی حەفت ڕوژ ئیستیقامەت کەرد
سازا چەنی وەقت هەوای گەرم و سەرد
دایېم مەشغووڵ بۍ چەنی میعماران
سنعەت تەرح مەکەرد جە ڕوژگاران
جوملەی مەهاجیر سیلسیلەی ئەنسار
عەمەل مەکەردەن هەر سوبح تا ئېوار
بەعزێ سەنگ ماوەر بەعزێ خاک وخشت
شېویا بازاڕی کلېسا و کەنیشت
حەزرەت مەشغووڵ بی دایېم پەی سەواب
دوعای خەیر مەکەرد پەی ئەهلی ئەسحاب
پەی پەی پەیاپەی دەمدەم سات بە سات
جە ڕووی مەرحەمەت هەر ئېدش مەوات
اللهم الخیر ڕب العالمین
فارحم الانصار و المهاجرین
نەقلەن چوون یە کوڕو عەمماری یاسەر
خشتش مەکېشا بە پاو بە سەر
یەک ڕەجزی وانا بە زەلیل و زار
مەعنا بە عەدەم فەعلە و میعمار
یەک جە ئەسحاب هیچ کار نەکەردە
پەی بە مەتالیب دوعای نەبەردە
بەو تەورە زاناش عەممار دڵسەردەن
وە دڵ دوعای بەد پەرێ ئەو کەردەن
دەردەم ئاخېز کەرد جە ڕووی بۍ باکیی
بە خەشم وستەرە بە غەزەبناکی
واتش: ئەی عەممار خاموش بەر جە دەنگ
وەرنە بە عەسا بادام چۊی خەدەنگ
ئەعزای ئەڼامت مەکوۊن بە هەم
هەنی زندەگیی نەوینی بە چەم
حەزرەت ئېد شنەفت جە ئەو ئەسحابە
ئەو ئەلفازی تاڵ ترش و خیتابە
غەرما وە عەممار هەردوو دیڎەی من
عەزیزەلوجوود بەر بەرگوزیدەی من
هەرچی موهاجیر تاکەی وە ئەنسار
عەمەلە وە فیعلە تاکە وە میعمار
سەحابان یەک یەک خشت نزدیک مەکەرد
عەمماری یاسر دوو دوو خشت مەبەرد
حەزرەت هەر سات دەس موبارەک مەبەرد
خاک جەسەر و ڕووی عەممار پاک مەکەرد
فەرما کە عەممار خەیلێ مەسجوورەن
مەفتوونی لازم خەیلێ زەروورەن.[1]