باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و پەنجەمە
وەختێ عەبدوڵڵا و بن سەلامی ئیمانش ئارد، ئەسحابەکۍ بە دەنگی بەرز گۆرەیی خوڎایشان واتۆ، شوکرانەو خوڎایشان کەرد. عەبدوڵڵا ئیبنی سەلام ماچۊ: گەر یەهوودیەکۍ پی کارەو من بزانا، ئانە کوورۍ غەزەبیشا جۊشیۊ، دەست کەران بە بوختانکەردەی پەیم، مەشۊم من ماوێ وېم پەنهانی کەروون.
سەحابان سوجدەی شوکر بەردشان
سەنای عەبدوڵڵا خەیلێ کەردشان
عەبدوڵڵا عەرزکەرد: یا خەیرولبەشەر
تایەفەی یەهوود قەومی بەڎ گەوهەر
خەیلێ دروغ گۊ، ئیفتیرا بازەن
ناپاکی بەڎپوش بۍ ڕای ناسازەن
ئەر ئیسلامی من بشنەوان وە گۊش
کوورەی غەزەبشان گرد مەیۊ نە جۊش
ئیفتەرا و بوختان مەوینان پەرێم
ناساز و غەڵەت مەواچان نە ڕېم
مەسڵەحەت ئېدەن من پەنها بکەر
بپەرسە جە قەوم گومڕای کەم هونەر
واچە عەبدوڵڵا مەرتەبەش کامەن
عولەمای عەسرەن یاخۊ عەوامەن
مەزاجش ئەندېش یا هەر ئەشرارەن
ساڵحەن مٶمن یا بەڎکردارەن
حەزرەت ئیلتیماس عەبدوڵڵا وە دڵ
قەبووڵ کەردشان پەنهان جە مەنزڵ
یەهوود تەڵەب کەرد یەکسەر خاس و عام
ئیستیفارش کەرد جە بەنی ئیسلام
واتەن: عەبدوڵڵا ڕەهنمامانەن
ئېمە گرد ڕەعیەت ئەو پاشامانەن
مەزەی جورعەی جام بادەمان ئەوەن
مەعلوومەن مەعلووم زادەمان ئەوەن
خەیلێ پەڕ عیلم بوزورگەوارەن
ئاگاش جە کردار لەیل و نەهارەن
بولبولی باخچەی ڕەوزەی نەعیمەن
واریسی تەورات مووسای کەلیمەن.[1]