دوورکەفتەی یاران
میرزا ئۆلقاڎر، جە دووری دۊسێ، یا کەسێش ئی شېعرېشە واتېنە، بەڵام زیاتەر جە کەسێ نزیکی دیارەن پېسە فەرزەندو وېش، کە نامێوەش کیاستېنە پەی میرزای، هەر حەرفش سەڎ نېش وە جەرگم شانا، جە دووری ئا ئازیزەیشەنە وەهارش زمسانەن، دیڎېش گوڵ و گوڵزار نمە وینا، پەنەش ماچۊ: بولبولان پەی تۊ، گوڵان وە بۍ تۊ، تەمامی نیشتەن واوەیلاو ڕۊ ڕۊ.
دوور کەفتەی یاران دوور کەفتەی یاران
فەرزەند عەزیز دوور کەفتەی یاران
بینایی دیڎەی دڵ پەڕ جە خاران
مانگو مەلول نە کوچەی شاران
زۊری زرانی بابۊی دەروون ڕېش
نامەت هەر حەرفش پەرێ من سەڎ نېش
نامەت گۊیا شەرح مەماتم وانا
هەر حەرفش سەڎ نېش وە جەرگم شانا
یاوا وە سەروەخت بابۊی هەژارت
وە دایەی سەرسەخت نابینای تارت
هیچ مەوەر وە تەنگ و یانەشەوە
پەرێ بیناییش بکیانەشەوە
ئیمساڵ وە بی تۊ، شاوە هەم پاوە
تەمام خاپوورەن بڎیە دماوە
شاخ و داخ و زاخ کەش و کۊسارا
پەی تۊ مەگرەوان وەبۍ مودارا
دڵ سۊزان قەومان ئازیزان خوېشان
کوڵ پەی دووری تۊ هەر ئاخ مەکېشان
باخان چەمەنان بەرزان دیاران
وە بۍ تۊ ئازیز دنیا مەویاران
بوڵبوڵ کەردەن تەرک باخان پاوە
چنوور بەرنامان ئېمساڵ جە شاوە
بوڵبوڵ جە باخان گوڵان جە هەردان
کوڵ شینشانەن چوون ئازیز مەردان
بوڵبوڵان پەی تۊ، گوڵان وە بۍ تۊ
تەمامی نیشتەن واوەیلا و ڕۊ ڕۊ
بوڵبوڵ ئاوازش تەرک کەرد نە باخان
چنوور بەرنامان نەبەرزی شاخان
گرد ئینتیزارەن جە دمای وەهار
وە ئامای تۊوە بیان ئه و دیار
ئەوەند بزانە وە بۍ زیاڎ و کەم
چەند‌یتەر کەشی شاڎ مەوین وە هەم.[1]