ناونیشانی بابەت: با تەبابین لەپێناو خاک و نەوەی داھاتوومان
ئامادەکردن: بەختیار وەیس
ئەڵێن مێژوو فاکتەرێکی گرنگی ڕێکخەری ڕیزەکانی گەلە. گەر ئەم دەستەواژەیە بۆ گەلان و قەوارەکانی تری دونیا ڕاست بێت، ئەوا بۆ ئێمەی کورد، بە درێژایی مێژووی کۆن و نوێ، جگە لە پەرتەوازەیی و پەرتبوون و دوو بەرەکی، مانایەک و بوارێک و ساتێکی بۆ ئاشتی و تەبایی و یەکگرتوویی و یەکبوونی تێدا بەرچاو ناکەوێت.بە چاوخشاندنەوەیەکی خێرا بە مێژووی پێنج سەدە لەمەوبەر و بەتایبەتی بۆ سەرەتاکانی سەدەی شازدەهەم و ڕوودانی شەڕی چاڵدێران لە ساڵی 1514 زاییندا لەنێوان هەردوو ئیمپراتۆریەتی فارسی شیعە مەزهەب و عوسمانی سوننە مەزهەب، کورد بەسەر دوو بەرەی جیاواز و لە دوو دابەشبوونی جوگرافی جیاواز و دژ بەیەکتردا دابەشبوون!ئەم دابەشبوون و دابڕانە جوگرافی و مێژووییەی کورد کاریگەریی گەورەی خراپی لەسەر داهاتووی کورد جێهێشتووە و تا ئێستاش ئەو کاریگەریە لەسەر تەواوی ستراکتۆری نەتەوەیی کورد ماوە.ئەگەر مێژوو بۆ گەلانی دونیا هۆکارێکی گرنگ و ڕێکخەر و یەکگرتن و یەکێتی ڕیزەکانی گەل بووبێ، لە بەد بەختی کورد ئەم چەمکە بە دیوە گونجاو و ڕێکارە مێژووییەکەی خۆیدا بۆ ئێمە ڕاست وەرنەگەڕاوە و مێژووی ئەم چەند سەدەیە تا ئەمڕۆش هەمان دوو بەرەکی و کێشمە کێشمی زیانبەخش و ململانێ و خۆخۆریە و هەمان دابەشبوونی مێژوویی و جوگرافی و دونیابینی و دوو بەرەیی لەنێو سەرکردایەتی و فەرمانبەدەستانی کورد هەر هەیە.کورد نەک هەر دوژمنەکانی لێی دوور نین؛ بەڵکوو لەگەڵی دەژین. هەمیشە لە هێرش و پەلاماری بەردەوامدان و پەرتبوونی سیاسی و تۆخبوونەوەی هێڵی جیاکاری جوگرافی ، جیاکاری و جیاوازی بەرهەم هێناوە و بواری ترازان و دوورکەوتنەوەی فراوانتر و گەورەتر کردووە. هەر بۆیە ئەم پەرتەوازەیی و داخرانە ڕەنگدانەوەی نەرێنی و خراپی لە هەموو بوارەکانی تری فکری و سیاسی و بۆچوون و نەبوونی یەکگرتوویی هەڵوێست لە کرداردا لێکەوتۆتەوە و نەک هەر ئاساییشی نیشتمانی و نەتەوەیی؛ بەڵکوو خودی جەستەی نیشتمان و سەراپای نەتەوەی تووشی مەترسی و لێواری مەرگ کردۆتەوە.لەمانەوە، پێویستە هەموومان بەرژەوەندی خۆمان و حزبەکانمان بەلاوە بنێین، لەخۆبردووانە لە بەرژوەندی تەسک ببوورین و تەنیا هەر هەوڵی یەکڕیزی نەتەوەیی و بەهێزکردنی هەستی نەتەوایەتی بدەین. پێویستە لەم هەوڵەدا جەخت لەسەر گەنجەکانمان بکەینەوە چونکە هێزمان لە تەبایی و یەکبوونماندایە. ئێستاش کاریزمایەکی وەکوو جەنابی سەرۆک مەسعود بارزانی بە لەخۆبردنەوە لە هەوڵ و کۆششدایە بۆ یەکڕیزی و یەکێتی و تەبایی کورد. [1]
Kurdîpêdiya ne berpirsê naverokê vê tomarê ye, xwediyê/a tomarê berpirs e. Me bi mebesta arşîvkirinê tomar kiriye.
Ev babet bi zimana (کوردیی ناوەڕاست) hatiye nvîsandin, klîk li aykona
bike ji bu vekirina vî babetî bi vî zimana ku pî hatiye nvîsandin!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Ev babet 337 car hatiye dîtin
Raya xwe li ser vî babetî binivîsin!