=KTML_Bold=Demokrasîya serdestan û xewna bindestan!=KTML_End=
=KTML_Underline=ikram oguz=KTML_End=
Demokrasîya serdestan jî ji bo bindestan faşîzm e!
Ji bo rastîya vê gotinê ne hewce ye, ku mirov kûr û dûr biçe.
Berê xwe bide welatê ku jê ra dibêjin Tirkîye û tê da li rewşa tirk û kurdan binêre, dikare vê rastîyê bi hêsanî bibîne.
Li welatê ku bi fermî jê ra dibêjin Tirkîye, tirk û kurd dijîn.
Tirk li ser axa xwe…
Bi nav û nasnameyên xwe…
Bi ziman û çanda xwe…
Di bin sîwana dewleta xwe da azad û serbest dijîn.
Kurd jî li ser axa xwe…
Lêbelê bê nav û bê nasname…
Bi ziman û çanda tirkan…
Di bin zilm û zordarîya dewleta tirk da dijîn.
Jiber ku di pergala dewleta Tirk da:
Tirk serdest…
Kurd jî bindest in.
Loma pergala dewletê jî ji bo tirkan bi tewna demokrasîyê, ji bo kurdan jî bi tewna faşîzmê tevdigere.
Zagon û makezagona wê yek, lêbelê li bajarên Tirkîyê û Kurdistanê, ji bo tirk û kurdan cuda tê sepandin.
Mijara ku trik û kurd îro pê mijûl in, hilbijartin e.
Loma ez jî dixwazim ji bo yekê di derbarê hilbijartina tirk û kurdan da mînakek bidim.
Çar sal berê, di hilbijartinên şaredarîyan da, li bajar û bajarokên Tirkîyê tirk, li piranîya bajar û bajarokên Kurdistanê jî kurd hatin hilbijartin.
Di demeke kin da hemû şaredarên kurd ji kar hatin dûrxistin û li şûna wan jî parêzger û qaymeqamên dewletê hatin tayînkirin.
Pişti heman hilbijartinê şaredarê tirk ê ku li bajarê Yalovayê hatibû hilbijartin jî dîsa ji alî wezareta navxweyî va ji kar hate dûrxistin. Lêbelê li şûna wî parêzgerê dewletê nehat tayînkirin. Meclîsa şaredarîyê civîya û ji nav xwe şaredarek nû hildibijart.
Ji pêvajoya jidûrxistin û hilbijartina şarêdarên Yalovayê ra demoikrasî, ji dûrxistina şaredar û tayînkirina parêzger û qaymeqamên li bajar û bajarokên Kurdistanê ra jî faşîzm tê gotin.
Li Tirkîyê sînorê wê teng be jî, pergala rêvebirîyê ji bo tirkan ber bi demokrasîyê ji bo kurdan jî ber bi faşîzmê tevdigere.
Mixabin kurd ev pergala ku ji bo tirk û kurdan çep û rast dişuxule nabînin, ji wan wetrê tirk jî mîna wan di bin zilm û zordarîya faşîzmê da dijîn. Bixwe bindest û belengaz in, tirkan jî wek xwe bindest û belengaz dihesibînin.
Ew zagona ku ji bo endam û rêvebirên HDPê jî cuda tê sepandin, nabînin.
Wek tê zanîn, HDP xwe wek partîyeke ji partîyên Tirkîyê bi nav dike.
Herçiqas girse û hilbijêrên wê bi piranî ji kurdan pêk werin jî, di nav rêvebirîya wê da tirk jî cîh digrin û di sîyaseta HDPê da roleke sereke jî dilîzin.
Ew di axaftinên xwe da ji rêvebirên kurd zêdetir tûj biaxifin û rêya Îmrali û Qendîlê bikin rêya avê jî nayên darizandin.
Jiber ku ew tirk û serdest in.
Bi heval û hogirên xwe yên kurd va di heman çalakîyan da cîh bigrin û heman gotinan bikin jî, ew li derva û li ser serê kurdan tên gerandin, rêvebirên HDPê yên kurd jî di heps û zîndanan da rojên xwe yên bêdawî dijmêrin.
Ev yek jî nîşan dide, ku ne tenê li bajarên Tirkîyê û Kurdistanê, ji bo rêvebirên HDPê jî pergala rejima tirk, ji tirkên serdest ra bi bayê demokrasîyê, ji kurdên bindest ra jî bi bayê faşîzmê tevdigere.
Loma di her hilbijartinên Tirkîyê da û bi dengê kurdan ji para rêvebirên tirk ra kursîyên parlamentoyê, ji yên kurd ra jî ranzayên sar dikeve…
Li seranserê dinê hilbijartin pîvanek ji pîvanên demokrasîyê tên dîtin.
Lêbelê ev pîvan jî ji bo kurdan pîvaneke derbasbar nîne.
Jiber ku dengê kurdan di hilbijartinên parlamentoyê da jî cîhê xwe nabîne.
Neyê dizîn ya jî neyê guhartin û heta Enqereyê here jî, di parlamentoya tirkan da reng duguherîne û bi tirkî li ser kurdan ra şûnda vedigere.
Loma ev çil sal e, ti carek beşdarî hilbijartinên Tirkîyê nebûm û min dengê xwe neda.
Di hilbijartina 14ê Gulanê da jî beşdar nabim û dengê xwe nadim.
Jiber ku di encama vê hilbijartinê da jî pergala dewleta tirk û statûya kurdan nayê guhartin.
Kurdên ku wek parlamenter werin hilbijartin, bere xwe didin Enqerê û di roja ewil da li ser namûs û şerefa xwe sond dixwin, ku ew dê ji rê û rêbazên ku Atatirk sed sal berê daye ber wan, dûrnekevin…
Ew ji bo kursîyeke nerm û germ bi hezar teorîyên nûjen maneyan bibinîn û helwesta bixemilînin jî, nikarin ji gunehkarîya xwe ya ku bi sondxwarinê ra dikin, bifilitin.
Bêguman ez bi tena serê xwe nikarim rê li ber gunehkarîya wan bigrim.
Lêbelê ya ku dikarim ev e, ku ew jî naxawazim bi dengê xwe bibim hevparê gunehên wan…
08-03-2023
ikramoguz@navkurd.net
[1]