دیڎگاو ئایینو زەردەشتی پەی ڕۊحی:
بەپاو باوەڕو زەرەدەشتیەکا ڕوح نەمرەن، گرڎ کەسێ بە یەرۍ ڕۋۍ دمای مەردەیش، ڕۊحەکەش مەگېڵۊوە پەی دنیێ و تاموو ژیوای چەشۊ، ئینجا هەوا هۊرش گېرۊن و بەرۊش پەی (پردەو جینوەتی) ، چاگە وەردەمو یەرۍ داڎوەرانە داڎگایی کریۊن کە گۆرەو داڎوەرەکاچ (میهر) ەن، چا داڎگانە، گردو کەردەکاش بە خاس و خراب بە ترازیۍ پیمیا، ئینجا مەشۊم چا پردېنە پرۊوە کە جە (قولۊ ئەلبورزیۆ تاکوو ئاوەو دائیتیا) ی درېژە مەبۊوە، گەر ئا ڕۊحە خاسەکار بۊن، ئانە پردەکۍ پەیش پانە بۊن و بە ئاسانی پڕۊوە، بەڵام گەر ڕۊحەکە خرابەکار بۊن، ئانە پردەکۍ تیژە بۊن و مەگنۊرە دلۍ تاریکستانێ کە چەم چەمی نمەوینۊ.
ڕۊح گەر خاوەنو یەرۍ سیفەتا بۊن، کە کروک، هەم جۆهەرو درووشمە دینیەکا زەردەشتینۍ، ملۊنە بەهەشت، ئا دوروشمۍ ئینېنۍ:
1.نېیەتی خاس.
2.گوفتاری خاس.
3.ڕەفتاری خاس.
یانی ڕۊحی خاس ملۊنە بەهەشت، ڕوحی خراب ملۊنە جەحەڼەم، بەڵام ئا ڕۊحۍ کە خاسە و خرابەشا وەراوەرەن ملانە یاگێ پەنەش ماچان (هەمشتگان) ، چاگە تۊڵە و پاداشت نېیەن، دلۍ قورئانی موبارەکینە ئا یاگۍ بە (الاعراف) نامۍ بریێنە.[1]