کۊڵە داستانەو ژیوگای بۍ پەنا!
زوو یاوایمێ مەخسەڎ، یاگێ وەشەما گېرتە، فرە دڵگیر و ڕازاوۍ بۍ. پەی وارڎەو نانوو ساحبی ئازا سفرە ڕازیاوە و دەسما کەرڎ بە نان وارڎەی.
جیکەو مریچڵا و هەوای فېنک و ژیوگایێ زەریف... دڵی جە دڵبەری ئەسانۍ. مېمانەکەما ئېسرار کەرۍ و سوور بۍ کە ماشینە شاسیبۊڵندەکېش/ تایرەبەرزەکېش بارۊ لاو یاگە نیشتەرەکەیما، منیچ حەرچەندە واتم و پەنەم ناوەشا ئا گیواوە سەوزە و لوە پەڕەیە گەرەشېڵ کەری، بەڵام بۍ سوود و فایڎە بۍ. ماشینەش ئارڎ پاڵما و ئازا بەرەو جەعبەیش/ سننۆقەکېش هۊر داوە گۊرانیەش گیسنانە، ئا دەسان دەسە دەنگۍ دېوە. هەڵوژە و قەیسی ئەمنم... منیچ تەمام ئارامش و وەشیم شېویا. دەسشا گېرت، حەرتا گېیانشا چەنە بۍ سەرو ئا فەرشە سەوزەیوە هۊر پڕای و گەرەشېلشا کەرڎ.
چا دمای دەورووبەرما قەرەباڵغ بی. یانەوەیە چەولاماوە نیشتېبېنېرە، دەسشا کەرد کەباب کەرڎەی. مڎیەو پیاکەشا تەوەرزینێش گېرتەن دەسەوە یاوۊ حەر نەرێوە، زرم دوۍ، یەرۍ لەقیش چەنە برۊوە. ماوێ کەمەنە سەرشانێ تەڕکە نەرۍ و بنە براڵویش بڕیۍ. ئایېرێ تېژەش هۊر گیسنا، تینیش یاوۍ لاو ئېمە. ئاڼەش پەو نەشی دووبارە لوا سەرشانێتەر تەڕکېش بڕیێ و ئارڎېش پەی سەرو ئایېرەکەی. تاکو ئۍ تێژتەرەش کەرۍ. چن جارێ گەرەکم بۍ پا بنیەو جەرگوو وېمەرە بلوو واچووش پەنە چی ئەپاسە ئا نەرە و درەختە سەوزا بڕۊ و ئی سەوزەڵانیە ئاویر مدۊ؟ بەڵام بۊنەو ئانەی گېچەڵێما پەی نەتاویۊوە سەرفەنەزەرم کەرڎ. خۊ هۆرپڕاو دەسەو ئېمە و ناڵە و نرکەو ئا دەسان دەسەیە ئیسراحەتش پا مەحاڵەنە ناستە بۍ.
هەرچی ویروو هەرمانەو ئا کابرایە کەرېناوە، حەسابی تەمیېنارە. پەشتیم کەرڎێوە وەنە واتم : با ڕۊخسار و سیماشا نەوینوو. پەی ماوێ ئارام بېیانېوە. لام کەرڎ پیلامارە مڎیەو یانېوە ئارام و بېدەنگ پاڵمانە نیشتېنیرە و پەی وېشا خەریکۍ چای واردێنۍ. دیار بۍ گۊششا دان بە بڵنگوە دەنگ زلەو ماشینەکەو ئېمە. چی وەختەنە شەماڵێ تازە هۆرەش کەرد... حەر دڵقۍ سیاوېنۍ سەرو سفرەکەیمارە وا سووڕشا دۍ. وەختارێ سەرەنجم دا ئا هامسایمانێ زاڕوڵەکاشا پۆفەک وچیپس وەرا دەڵقکاشا فڕە مڎا هەوارە، هەراو هوریایە بەرز ماچا...
دماو نان وارڎەیشا شیشە نوشابەکا بە نیشانە گېرتەی شاناشا پا دلۍ ژیوگا و سرووشتیرە، حەرکامشا نیشانەکۍ پێکۊ بە دەنگی بەرز گرڎ عەواوجەمی/ئەواوجەمی چەپڵېش پەی کوا و تەشویقەش کەرا. ئیتر فووم کریا بېنە. دیسان دەروونم گیسانە، تۊ بیە ئی خەڵکە بۍ ئاوەزەیە چەنی ئی ژیوگا و سرووشتە پاکەیە تاسنا و تاڵان کەرا.
پەی ئانەی چی فەزایە دوور گنوە، دام باروو بېعاری، ئاڼەتەر دەنگو بڵنگوەکەیم فرە کەرڎ، نەمانێ چۆپی.
سابیر عەزیزی.[1]