زوانو هۆرامی بمانۊ یا بشناسیۊ؟
نویستەی: حەمەشەریف عەلی ڕامایی
دیارەن هەر زوانیە پەنەش نەنووسیۊ، نوانیو ئەوەمەنەیش مەحاڵەن. دېر یا زوو یاگۍ وېش مەدو بە زوانهایەتەری و مەلۊنە دلۍ زوانە بۍ دەنگەکا. پېسه و زوانە وەڵینەکا کە ئیسە نامېشا بە زەحمەت مەنېنە و یا هەر نەمەنېنە. تازە بڕیە زوانێ هەرچڼە پەنەشا نویسیان وەلی چوون نویسیاکەشا دەوامش نەویەن ئیتر نەمەنێنیوە. پېسه و زوانو ئارامی، پەهلەوی، لاتینی و ...تد.
ئارۊ گروڵیه و زوانو هۆرامیچ کەوتینە دلۍ لېژی. هەرچڼە پەی شناسای زوانو هۆرامی هەرمانۍ فرۍ کریاینۍ پېسەو: هەرمانەکاو ماموسا پیرەمێردی، عەلائەدین سەجادی و مەلا عەبدولکەریمی موددەریس. ئی زانا گەورانە بە هورئەوەگېڵنای بەرویرەکاو زوانو هۆرامی سەرو زوانو کوردی، ئی ڕایشانە کەردەره و ئی ڕچۍ مێڕیا. هەرچەند دڵسۊزانە کاریە بە یاگېشا کەرد پەی ئانەیە خەڵک جە فەرهەنگوو وېش بېیاوۊنە، بەڵام هەر پاسە کە ماچا: سکۍ دوۍ ڕوېش هەنۍ. ئی هەرمانۍ نویسەرەکېش هۊرنېیای ئا چېوانە کە وەڵتەر بە زوانو هۆرامی نویسیاینۍ هۊرگېڵیاوە سەرو زوانو کوردی. ئی هەرمانۍ تاکو ئا یاگۍ لوا وەروه کە کتېبهایە پېسەو: ڕوسەم و زوراو، شېخ سەنعان، حەمە حەنیفە، میعراج نامە، قەڵاو خەیبەری، وەلی دېوانە، ئاسمان و زەمین، شیرین و فەراڎ، شیرین و خەسرەو، خورشیڎ و خاوەر، دەوڵەت نامە، ڕۊڵە بزانی، مەنیژە و بیژەن، سوڵتان جمجمە... تد فرە ناشېیانه و قەرەت هورگیڵیایوە سەرو زوانو کوردی و فرېچشا حەتا نامۍ نویسەرە هۆرامیەکاشا چەنە سڕیانەوە و کەم کەس مزانۊ کە ئینۍ بنەڕەتەنە هۆرامیۍ بېیېنۍ. دیارەن هۊرئەوەگېڵنای چېویە خاسەن و کۊمەک مەکەرۊ بە وەڵاوەکەردەی فەرهەنگ و ئەدەبېیاتی، وەلێ هەر کاریە ڕایەش هەنە و ئەر ناشېیانە کریۊ، سەمەریە عاڵش چەنە بەر نمەی.
دماتەر نویسەرەکاو هۆرامانی پېسەو: دوکتور موحەمەد ئەمین هۆرامانی، ماموسا حمە کەریم هۆرامی، عوسمان موحەمەد هۆرامی، مامۊسا دارا و حەمەرەشید هۆرامی ... تد دەسشا کەرد بە نویسیەی، بەڵام نەک بە زوانو هۆرامی و نەک پەی گەشە و پەرەدای بە فەرهەنگ و ئەدەبېیاتوو هۆرامانی، بەڵکوو بە زوانو کوردی پەی شناسای تاریخ و فەرهەنگوو هۆرامانی. بە کوردی نویسیایەکاشا یاگۍ پەرمایەنە و هەر پاسە ئا هۆرامیانە کە جە ئێران و ئێراقەنە بە کوردی مەنویسا هەرمانەکېشا یاگۍ دەس وەشینە، بەڵام پەی ئانەیە زوانو هۆرامی بمانۊوە کاریە ناتەمامەن. چوون زوانو هۆرامی تاکو ئارو بەرش بەردەن و چانەیە ڕیشەدارتەرەن کە ئېمە هەر تەنیا بە ئەشناسایش قەناعەت کەرمۍ، بەڵکوو مەشیۊ سەرو بنج و ڕیشه و وېشوە بمانۊوە و جە فوتیای نەجاتش بۊنە. پەی ئانەیە هەم بمانۊوە و هەم بشناسیۊ، ئانە شمە، ئانە زوانو هۆرامی، ئانە قەڵەم و کاغەز. مەگەر ماموسا خدر نەفەرماوانش:
قەڵەم و دەوات با بۊنە پەرېت
هەرچیە مژنەوی بنویسە پەی وېت.[1]
Kurdîpêdiya ne berpirsê naverokê vê tomarê ye, xwediyê/a tomarê berpirs e. Me bi mebesta arşîvkirinê tomar kiriye.
Ev babet bi zimana (هەورامی) hatiye nvîsandin, klîk li aykona
bike ji bu vekirina vî babetî bi vî zimana ku pî hatiye nvîsandin!
ئی بابەتۍ بە زۋانی (هەورامی) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
ی کلیک کەرە!
Ev babet 436 car hatiye dîtin
Raya xwe li ser vî babetî binivîsin!