ناونیشانی بابەت: پەیمانگایەک بۆ دیاریکردنى تەمەن و سەردەمى پارچە شوێنەوارییەکان دەکرێتەوە
ئامادەکردنی: #هەڵمەت بتوێنی#
بەڕێوەبەرى شوێنەوارى کۆیە ئاشکراى کرد، دواى داواکاریى فەرمانگە شوێنەوارییەکان، بۆ دابینکردن و تەرخانکردنى ئامێر و سستمێک بۆ دیاریکردنى تەمەن و سەردەمى پارچە شوێنەوارییەکان، بەڕێوەبەرایەتیى شوێنەوار و کەلەپوور، بە نیازى کردنەوەى پەیمانگایەکى پاراستنى شوێنەوارە.
#یەکێتى واحید#، بەڕێوەبەرى فەرمانگەى شوێنەوارى #کۆیە#، بە (باسکورد) ى ڕاگەیاند: ئەو پارچە شوێنەوارییانەى دەدۆزرێنەوە هەندێکیان بە لێکۆڵینەوە و پشتبەستن بە نووسراوەکان، تەمەن و سەردەمى درووستکردن و ژیان لەو کاتدا دیار دەکرێت، بەڵام زۆریان پێویستیان بە پشکنینى تاقیگەى تایبەت بە شوێنەوار هەیە، بۆ ئەوەى تەمەن و سەردەمەکەى بدۆزرێتەوە. وتیشى: لە هەرێمى #کوردستان# ڕاستە کادیرى شوێنەواریى باش هەیە، بەڵام تا ئێستا ئامێرى دیاریکردنى تەمەن و سەردەمى پارچە شوێنەوارییەکان نییە، بۆ ئەو مەبەستە، دەبێت پارچە شوێنەوارییە دۆزراوەکان لە ڕێگەى تیمە بیانییەکانى شوێنەوارەوە بنێرینە دەرەوەى وڵات، کە ئەوەش خەرجى و کاتێکى زۆرى دەوێت.
باسى لەوەش کرد: کابینەى نۆیەمى حکوومەتى هەرێمى کوردستان بایەخێکى زۆرى بە شوێنەوار داوە، بۆیە دواى هەستکردن بەو گرنگییەى شوێنەوار، ئێستا بەڕێوەبەرایەتیى گشتیى شوێنەوار و کەلەپوور، هەوڵى کردنەوەى پەیمانگایەکى ئەهلى بۆ پاراستن و دیارکردنى تەمەن و سەردەم و بەکارهێنانى پارچە شوێنەوارییەکان دەدات، کە بەدڵنیاییەوە خزمەتێکى باش بە کەرتى شوێنەوارى هەرێمى کوردستان دەکات، بەدەر لەوەش، دەرفەتێکى باش بۆ ڕەخساندنى هەلى کار بە دەرچووانى شوێنەوار دەدات.[1]