وېش میر و وېش مەڵڵان
میر و مەڵڵا، دوۍ کارەکتەرۍ دلۍ کۊمەڵینۍ کە دەسەڵاتێ دینی و دنیاییشان بېیەن، دەسەڵاتی دنیایی پەی ڕایی کەردەی هەرمانە و بارو خەڵکی و سەپنای ئەمن و ئەمانی دلۍ خەڵکینە. دەسەڵاتی دینیچ پەی مۊچیاری و ڕانمایی کەردەی خەڵکی پەی خاسەی و ڕەفتار کەردەی بە جوانی و خاسی.
بە کەسێ واچیان: وېت میر و وېت مەڵڵا، یانی ئیتر دەسەڵاتەکەشا دان دەسو وېشۆ، پېویسش بە یارمەتی و ڕانمایی کەسی نەبېیەن. دوۍ کەسۍ خەریکۍ هەرمانێوەنۍ، یۊشا ڕامنیۊرە پەی ئەویشا کە چېش کەرۊ و چەنی کەرۊ، بەڵام ئاڎ هەر سوورا سەرو ڕاو وېش، ئیتر کەسی یەکەم ناعیلاجۍ ماچۊ: برا دەی تر وېت میر بەو وېت مەڵڵا. یان وەختێ چن کەسێ باسو نەفەرێ کەران هەکە گۊش پەی کەسی نمەدارۊ، هەر بە ئەقڵو وېش هەرمانە کەرۊن، ئی ئیدیومېشە پەی ماچان. فرەو جاری بە نازیچۆ ئەڎا و تاتە ماچاش بە زاروڵەکاشان، وەختێ زاروڵەکېشان گەرەکشان نېیەن ئەڎا و تاتەشان بلانە دلۍ هەرمان و کاریشان، پەنەشان ماچان کێفو وېتانە، چېش کەردۍ، کەردۍ، شمە وېتا میرېندۍ و وېتا مەڵڵێ.[1]