سەفەریە پەی هەوارەکەو بېسارانی
بەشۍ: یەرەمە
ئەلحەق ئەر یۊ سەرەنجوو ئی چېوا بڎۊو بە ساڪاری لاشانە نەویەرۆ، فرەتەر ڕۊحش چەنی ڪارەڪەو گەردوونی تێڪەڵ بۊ و سۆجدەو شوڪری بە یاگێ مارۆ.
بە خیاڵوو وېما جە پەرساو زاڕۆڵا ڕزگارێ بیێبێنمێ. ڕاما بڕیە و مەڵاحەمەڎانما جیا ئاست و جاڎەی قەمچ و پېچما دا سەر تاکو یاوەیمێ داخان. ئا مەحەلێ نزیڪ بە دە هەوارابۊ. هامسای پێوەرە و مڵڪێشا هام بڕێ. حەتا زاڕۆڵەی دوە ساڵشا مزانۆ حەریموو یانە هامسای چېشا و پەی یۆوی حورمەت منیارە. هیچ‌ڪام خەسار نمەڎا باخ و باخاتی و ماڵوو هەنترینی بە دڵ پارێزنا.
چن میترێ لوایمێ. نەختێو سەر و وارش بێ. هانېوە وەش، ئاوی چیایش چەنە ئێرە دلێ ڕۊخانەی. چن زاڕۆڵێ بە دەبە ئاوێ سەرو هانەیشا گېرتەبێ. چەمشا ڪەوت بە ئېمە واچېنی ڪەسێوی عەزیزشا جە سەفەر ئامەنوە. وەشنیم چەنی ڪەردێ و بە دڵە پاڪە بێگەردەڪەشاوە پېسەو ژەرەژەو لا شەتاوی ڪەوتێ وەنای و دەسێشا بە نیەتوو خێرئامای ئېمە، پېسەو باڵو فریشتەی وازێ ڪەردێ و بە خوەی شیرینشاوە ڕوانەشا ڪەردێمێ.
یاوەیمێ دەرەقووڵ ڪە هەواروو تایفێویەن. چاگەنە واڵە و برا و مامۆ مامۆژەن گردی نزیڪ بە یۆی پێوەرە ژیوایشا مڎا سەر و چەنی خەم و خەفەتوو ڕۊزگاری ساچا و خەمشا خەموو یۆین و وەشیەڪاشانە شەریڪێنێ. گرد وەختێو پېسەو پەنجەو دەسی پاڵپەشتی هەنترینی ڪەرا و مازی خەفەتاشا ماڕا.
شاڪەڵەڪێوە گەورەشا ڪەراخوو ڕۊخانەیەنە چنیەبێ. زانێنا هینوو چن ساڵێ چیوەڵین و ئا ڪەسە بنەڕەتەش نیان دەسش جە دنیای کوڵ بېیەن، بەڵام ئا هەرمانېشە بیېنە وەشتەرین خەڵاتی و پەڕچین، هەم پەی لافاوێ و هەم سەنگەرێوی گەورە پەی ئا دار نەماما ڪە وەڵتەر نریێنێ دلێ خاڪی و ئیسە بېیېنۍ بە ڪۆنەدار و یار و یاوەروو پەلەوەری و پەڕچین و حەسار پەی باخەوانی تازەی ڪە بە میراس یاوان دەسش،
بەڵام گجاریو دڵوو وېمەنە واچېنا، داخۆم ئەر ئی باخەوانە تازە پەنە یاوا، بێ‌ڕەحمێوە ڪەرۆ بە دار و چڵیش، ڕۊحوو ئا ڪەسیە ڪە ئاوڎانش ڪەردەن و ئیسە دەسش دنیای بڕیان نەچڵەڪیۆرە؟!
دڵوو وێچم چڵەڪێوە ڪەرێ. ئا پەرسێ فرە فرە سەختەبێ پەیم. زانێنا ئا ڪەسە نەمامێوە منیۊ دلێ خاڪی ڕېخێش ئامێتەو ڕەگاش ڪەرۆ و چەنی دڵیش گۆەش پێوەن مڎۆ.ڕاڪێما فرە درێژە نەبۍ، چوونڪوم چەمېما تەژنەو تەماشای بێنێ و مریچڵێ حەزیما ڪەوتێبێ باڵ‌فڕ، ئاواتە وازێنا یۊ چا پەلەوەرا بوو سەرو چڵی بەرزوو پیرە دارېوە هێلیانە بینوو و دەنگم ئامێتەو چریڪەو سرۆشتی ڪەروو تاکو پەی بەروو بە ڕازەو دڵیشا و بزانوو دڵشا چېش وازۆ. پەی هەمیشەی سەیروو دار و درەختی تاسەو دڵیم ماڕۆ. ڕاڪێما نەختێو سەرەوڪویش بۍ و ماشینەڪەما ڪەوت هەناسە بڕڪێ و بە ویانێ شەڪەتی ماشینی بەرەش هاڵی ڪریا و پېسەو ژەرەژەو دلێ قەبەزی ڪە ئاواتەوازوو فڕیایبۊ، بۍ پەل و باڵ ڪەوتێمێ باڵەتەپێ و بە واڕەی هەنگاما سەرو تەوەن و خڕیرە دەنگېوی وەش و حێسیوی جیاواز ڕاما گەزە ڪەردە تاکو یاوایمێ بە چن هەوارا تەری.
خانم ئەسرا شەریفی.[1]