قۊناغەو هەرزەکاریم
بەشۍ: ششەمە
سەفەری دوەم پەی ئێرانی و چاگەیچۆ پەی سویدی
پاییزو (1983ز) بارگەو بنەم پیتۆو لوانۍ دەمو
پېخامەکەو کاک شۆکەتیۆ، کە ئەژنیەبېش ڕاو خارجی کریێنۆو، ئەمەلېو شکە بەرۊ. هەرچنە خەڵکو هۆرامانی و بەڵخەی بەتایبە لەزەتی فرەما نەبەردەبۍ جە دەسەڵاتو عەبدولوەهاب ئەترووشی، بەڵام ئانا ئیسە دیسان بۊنەو کاکێمو ئاییشاوە، پېسەو هەنگی شۊنەو هەراڵەیەرە گېڵو، هەر یاگېوە ئاڎېش چەنە بېنۍ عائیلەو ئېمە ڕوەش کەرېنمېنە. بیلمەقابل ئاڎیچۍ پەی من هیچ کەمتەر خەمیوشا نەکەرد، یووشا وەرەقەش پەی کەرداو یویچشا ئاما چەنیم حەتا لا مەرحومو کاک ئیدریسی. حەرپاسە یانێچشا یاگۍ حەوانەوەیم بېنۍ، مەمنونو وېشاو هامسەرەکاشانا کە پا ئیمکانیەتە مەحدودیەیشاوە دەممۆ بێنۍ و نازم کېشېنۍ.
نزیکەو سالېویش پەنە شی هیچ باسو جوابېو جە سەفەری نەبۍ. ڕوېشا مامو نوشیروانو مام یارەی کە بە کوچو کڵفەتۆ ئیلتیحاقشا کەردەبۍ بە شۆڕشیۆ، ماچۊ نمەی بلمێ پەی دۆرو تارانی و کەرەجی، هەم پەی ڕەفیقو ڕې و شایەت هەم من بە سەبەبو ئانەیە کە زوو تەر لوابېنۍ ئێرانو چەموگۊشم کریابېوەو فارسیەکێچم خاستەر بۍ. ویرم نېیا ئەر وەڵتەر مۆعیدش چەنی کاک سەرباز هۆرامی هۊرگېرتەبو یان نا، بەڵام هەرجورێ بی سەرەما یانەو ئاڎیشاوە بەرئاما. کابرێویچ بە نامی کاک جەرجیس فەتحوڵڵای چاگە بۍ، مەسیحییوی عمر مامناوەندی داناو زانا بۍ، چەنی یانەو مەڵڵا مسەفای وەشش ئەییو هەر پاسە پېوەڼی پتەویچش بۍ چەنی سەفارەتو سووریەی جە تارانەنە. دماو چاییو شیرینی واردەی، کاک سەربازی وات پەنە بەشکوم تەڵەبېیەیەکی سووریەبۊ ئەم کوڕی مام یار ئەحمەد بەگە وەرگری. ئاڎیچ فرە دەستو پردانە قەڵەمو کاغەزش جانتا دیپلۆماسیەکەشەنە بەر ئاردو نامۍ مامو نوشیروانیش نویستە. منیچ بە نیمە سەعبەت و نیمە جددی واتم مەکریۊ نامۍ منیچ بنۋیسی، کی ماچۊ ئەسڵەن نامېم پەی زەمالەو چېوی مەیوە! پیسەو شاعیر ماچو
أین نەقد بگیر و در آن نسیە بگوزار، کە ئاوازی دەهوڵ أز دور خوشەست.
کاک سەربازیچ خوا هورمەگېرۊ بۍ دوەدڵی واتش پەنە، نامۍ منیچشا وستە نامگا. دماو ئانەیە یەکسەر کاک جەرجیس بەسەیارەکەو وېش بەردیمېش پەی سەفارەتو سووریەی. حەر بە گاڵتەو گەپ چەنی فەرمانبەراو سەفارەتی، چارەکېوش پەنە نەشی ئاما بەرو یۊ وەرەقێوش دایېمۍ پەنە بە عەرەبی پۊشۆ نویسیابۍ: مەناعەتما نېیا کە فڵانکەس سەفەر کەرۊ پەی سووریەی، دەسوەشیما چەنی کەردو یەکسەر تفما کەرد قاچېما پەی وەزارەتو کیشوەری.
کە نامی تاتێم سان ئەحمەد بۍ، فەرمانبەری سلیمانی بەلاقرتیۆ واچېنۍ ئەها، سان جموو بەغڎای مەگېرۊ. ئێرانیچەنە نامەکۍ وېم بیېبۍ بەڵا پێم، پەنەم واچېنی فاروق الاعظم، چوونکوم نازنامی خەلیفە عومەری کوڕو خەتابېیەنە. حەر پا سەبەبیچۆ، من بزانو دلۍ ئێرانېیەنە حەتا سونیەکېچشا نامۍ فاروقی مەنیا. مەعامەلەکەو مامو نوشیروانیشا هەر زوو هۊرگېرت، چوونکوم نامەکېش ئێرانیە بۍ، هینەکەو منیچشا دماو کوچیو عەزیەتی نەفسی هورگېرت. (کە تەڵەبیەو سووریەیت بیێ تاوېنی مەعامەلەو پاسپورتی موەقەتی (لیزەپاس) ی کەری ئینجا هەریاگیوی ڤیزەشا دابېیەنی پەنە تاوېنی سەفەرش پەی کەری، چا زەمانەنە ئەڵمانیای شەرقی بە قاچاخی ڤیزە ورەشېنۍ بە (25) دولارۍ.)
فاروق سان ئەحمەد.[1]