ڕۊمانەو (چېرو دارتفێنە)
ئەژناسنای و هۆرەوگېڵنای پەی هۆرامی: ڕەزا بەهمەنی
نامۍ کتېبی: چیرو دارتفێنە (بنەو تفەکېنە)
نویسەر: ژیوار ڕەشید، بە زوانی سۆئێدی
بەشۍ: یەکەمە
ڕۆمانەکە پێ شێعرەو ڕەفێق سابیریە دەس پەنە کەرۊ:
بە تەنیا نمازەم جیا
ئېشەو تۆفان خنیکنۆم!
وەڵێ ئانەینە بلوو سەرو باسوو ڕۊمانەکەی، مشیۊ چن وات و ۋاچۍ چەنی وانەرا ئی بابەتیە کەرۊ.
زوانو ئی ڕۊمانیە پەی من قورس بێ، هەر وەروو ئانەیە بە جار و دوەجار نەتاوام پێوەنش چەنی گیروو. پۆکەی، پەی یەرەم جاری لوانێ سەرشەرە تاکو بتاو ئانە کە لایێقوو ئی ڕۊمانېیەنە بنوېسوش و هەقوو وېش جە پەیلوای وېمەنە دەو پەنە.
نویسەرو ئی ڕۊمانەیە کاکە (ژیوار ڕەشید) خەڵکوو هۆرامانیاو تەنیا چواردە ساڵێش بېیەن ئامان سۆئێد. دەبیرستان و دانشگاش جە ڕشتەو ئەدەبېیاتیەنە چی وەڵاتەنە تەمامنان و ئیسەیچ کە تەمەنش یاوان بە (35) ساڵێ، بۍ وچان خەریکوو وانای و نویسەیا و هەر چا بواریچەنە خەریکوو هەرمانێن.
بە قسێ کاکە ژیواری ئی ڕۊمانە نۆ ساڵێ سەرشۆ هەرمانە کریا تاکو تەمامیان.
ئی نویسەو منیچە نەقد نېیا بەڵکوو تەنیا موعەرفی و ئەژناسیاو ڕۊمانەکەیا. هۆڵم دان چا یاگانە کە بەسەرئاماکێ پێوەنێوی فرە قووڵ و بنەڕەتیشا چەنی کارەساتوو خەڵکوو هەڵبجەی و هۆرامانی و دەور و بەریش هەن، فرەتەر باس کەرو و چەنی بەسەرئاماکا هەنگام بە هەنگام بلوو وەرۆ. ئینەیچە بە وەرچەم گرتەی و پارێزنای دلێگەروو ڕۊمانەکەی تاکو وانەر وېش بلۆ شۆنەو لکەکارە و هەر وێچش کەرۊشاوە.
مەسەلێوە کە منش یاونانێ یاگێو تاکو وەختێوی فرە سەرو ئی ڕۊمانیۆ بنیەوەرە، ئێژایی و گۆرەیی ڕۊمانەکەی بێ.
چی ڕۊمانەنە ملمێنە دلێ دەریێوی کە بنەش نېیەنە. ژیوای ئینا دلێ ڕەنجیەنەو هەناسە گېڵای گېڵۆ شۆنەو پڕزۆڵێو هەوایەرە. ئەشق پڵۆزیانەرەو ئاسمان بوەو ساوێ مڎۆ. هۆرێ چەرمێ بە بی گرمنای مریچڵێ وارانارە وارو کاوەتری باڵێشا سۆتێنێ. سەماو گۆراڵا بیېنە بە شیوەن و گیواو دلێ دووکەڵوو خەمیەنە بېیەن بە قەقنەس. وەیوڵە باڵێ دەسو کناچڵاوە مرکیێنېرە و خوەشا نەمەنەن. باوشێ تاسەی هازیشا چەنە بڕیێنە و لاشەی نیمە گېیانوو زارۆڵە ساوایا هۊر مەگېرا. هاوار جە گڵۋیەنە پەنگېیان و شار بۍ دەنگ بېیەن. سرمەو چەما دلێ دیمەنوو تازە وەیوانە ئامانەرە وار و سەرو کوڵمە زەردەکاشاوە نەخشش بەسەن. دنیا تاریکیانەرە و چەمۍ دلێ دیدیەنە دەوارێ سیاوېشا هۊر دێنێ.
ڕەزا بەهمەنی.[1]