نامۍ: هەڵۆخان
نازنام: ئەردەڵانی
نامۊ تاتەی: سوڵتان عەلی بەگ
$ژیۋاینامە$
هەڵۆخان، براو تەیمورخانی، پاڼزەهەمین میرو ئەردەڵانەکا. ساڵەو (996 ک) دمای کوشېیای تەیموخانی برایش دەسش گېرت ملو تەمامو مولکو براکەیشەرە، گۊشوادای عوسمانیەکاو هەم پاشاو ئێرانیش قبووڵ کەرد، ئەپاسە پەی ماوەو دوۍ ساڵا گوزەرناش، ئەچا ماوەنە پایتەختو حکومەتو کوردەسانیش جە زەڵم و مەریوانۆ فاڕاوە پەی قەڵاو (پاڵنگان) ی، قەڵێوە سەختەو مەحکەمە، هیچ داگیرکەرێ نەتاوانش کېرۊش. هەڵۆخان دەسێش ئارد قەڵاکېرەو زیاتەر ئاوەڎانەش کەردۆ، چەنی ئانەیچ قەڵاکۍ (زەڵم و مەریوان و حەسەن ئاوا) یش ئاوەڎانۍ کەردێ. هەڵۆخان پیێوە مەرد و نەجیبزاڎە بۍ، چەنی ڕەعیەتەکاش بە وەشی و بە داڎگەری جمېوە، چەنی میرو دەسەڵاتدارە هامسایەکاش بە میهرەبانی ڕەفتار کەرۍ، قەڵەمڕەوەکەش ئاوەڎان کەردۆ، گەنجینەکېش پەڕۍ کەردێ، سوپاکېش پۊشتەو پەرداخە کەردۆ، ئیتر داواو حکومەتی سەربەوۍ کەرۍ، مل پەی هیچ دەسەڵاتێ عوسمانی و ئێرانی نەنامنۍ. شاعەباس وەختێ ئاگاڎارکریا جە جموجوڵەکا هەڵۆخانی، یەرۍ جار لەشکەرش کیاست پەی سەرو کوردەسانی، بەڵام هەر یەرە جارەکە مەڕیا، دماتەر شاعەباس ڕاو گفتوگویش گېرته، داواشکەرد بە ئاشتی گرفتەکا چارە بکەران. هەڵۆخان پەی نیاز پاکی وېش (خان ئەحمەڎ خان) ی کوڕە گۆرەش بە دەسو دیاری شاهانۆ کېیاست پەی دەربارو پاشای، چاگە حورمەتێ خاسش وەنەگېریا، شاعەباس پەی مەرامی سیاسیش (خاتو کڵاوزەڕەی واڵېش) کەردە هامسەرەو خان ئەحمەڎ خانی، پێمانش چەنە وەرگېرت کە چېرفەرمانش بۊ، داواش وەنەکەرد بگېڵۊوە پەی کوردەسانی، ئاڎییچ گېڵاوە پەی کوردەسانی و بەهەر تاکتیک و فېڵێ بۍ تاواش تاتەیش ڕازی بکەرۊ کە بلۊ پەی ئەسفەهانی، هەڵۆخان لوا، شش مانگۍ چاگە مەنۆ، حورمەتێ فرەشان گېرت، شاعەباس فەرمانو حوکومڕانیش پەی خان ئەحمەڎ حانی بەرکەرد، موڵکو کوردەسانی جە هەمەڎانۆ تاکو کۆیەو حەریر بە نامۍ خان ئەحمەڎ خانیۆ بەرشی، ساڵەو (1014 ک) خان ئەحمەڎ خان حکومەتو کوردەسانیش کۆت دەس.
ئەسعەد ڕەشید.[1]