ژیونایۆ شېعرەی هۆرامیۍ
بەشۍ: چوارەمە
نویستەی: #ڕەئوف مەحموودپوور#
زوانو شاعێری هەرپېسە باقی تایبەتیەکاتەروو شێعرێ حاسڵوو زانایی، هووشېیاریی، ژیوای و ئەزموونەکاو شاعێری و ئا ورکانە کە شاعێر پەی مەرزنایرەی پېوەڼیی چنی تاقمە جیاوازەکاو کۊمەڵگای گېرۆش وەر، پەوکای مەجبوور نېیا زوانی شێعریی تایبەت بە وېش بەپاو حەزەکاو ڕەخنەکاری، یان وەردەنگی وریای واڕۆ.
خاڵێوەتەر کە پەی شێعرێ سەردەمیانێ فرە لازما هورڕووشکنایۆ ئا ڕۆتیەنە کە شاعێرە وېیەردەکاما جە ڕازوانەنه گرتەن وەرو فرەوجارا سەرنجەشا لاو سۆرانیەرە گلیێنە. کە مەشیۆ ئی ئاوێ پەی شاجوە ڕەسەنەکێ وېش هورکریۊوە.
خاڵێوەتەر سەرنجدایا بە گەمە زوانیە خېیاڵیەکا؛ مەجاز، ئێستعارەی، عاتفە، تەلمێح، تەشبیە و.. کە لازما بەپاو ڕۆتوو سەردەمو شێعرێ تایبەتی جیاوازش پنە دریۆ.
مەشیۆ ئانەما هۊشبۊ کە بەرهەمی تازە جەلاو زەینێوە تازێوە هۆرقڵیۆ و ئاسایین ئەر کەلیمێ، دەسەواژێ و زوانێوە تازە و تایبەتیچ هەرچا زەینە تازێوە سەرچەمە گېرۆ. کەپاسەن مەبۊ چەمەڕاو ئانەیە بیمێ کە زوانێوە تازە جە زەینێوە سوویێ و پووکیێوەو پەروەردە نەکریێ هورگنۆ. پەوکای لازما شاعێری بەڕۆ وەڵێ گردهەرمانێوەنە سەرو زەینەو وېشۆ هەرمانە کەرۊ و پەی بەسەردەمیانە کەردەیۆ زەینیەتوو وېش هەوڵێ بڎۆ. بە تازە بېیەیۆ زەینییەتوو شاعێری؛ فکری تازە، حەز و هەستی تازە وەشبۊو ئی فکر و حەزێ دەسەواژێ و زوانێوە تازەشا چنە گنۆوە کە چنی وېیەردەی ساحېبوو جیاوازین.
دیارا هەر زوانێ ساحېبوو پتانسیەلی زوانی بۍ ئەوپەڕین کە بەهرەی تایبەت و زەینەی پەروەردە کریێ و ئەزموونکاریی هووشېیارانە، جە هەر سەردەمێنە بە کەشف کەردەی لایەکاش بە دۆڵەمەڼی و بەردەوامی و بەڕۆ بېیەیشۆ کۊمەک کەرا. بەتایبەت جە شێعرەنەبۊ بە سەبەبوو جیاوازی زوانی بەینوو سەردەمەکاو دەنگەکانە کە بە باوەڕوو فرێوە جە زانایاو ئی بواری ئی جیاوازیە زوانیە تاکو ڕادێوە فرە جیاوازی شێوازیی و هورکەتەی سەبکیش چنە گنۆوە.
جەلایېوەتەریچۆ مەبۊ چانەی غافڵێ بیمێ کە شێعرە بەهرێوە هونەریەنەو مەکریۆ تەنیا بە زوانبازی خولقیۆ، بەڵکووم زوان ئەر پەشتگیری هونەری و بە ئەدەبی بېیەیش پەشتەسەرۆ نەبۊ، سەقەت بەرگنۆ و نمەتاۋۊ شێعرەش چەنە گنۆوە. زوانبازی ئێفراتی و سەڵت، ڕۆتەکەی جە شاڕاو وېش لامڎۆ و ڕووبە نوقسانی و سەقەتیش بەرۆن.[1]
Kurdîpêdiya ne berpirsê naverokê vê tomarê ye, xwediyê/a tomarê berpirs e. Me bi mebesta arşîvkirinê tomar kiriye.
Ev babet bi zimana (هەورامی) hatiye nvîsandin, klîk li aykona
bike ji bu vekirina vî babetî bi vî zimana ku pî hatiye nvîsandin!
ئی بابەتۍ بە زۋانی (هەورامی) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
ی کلیک کەرە!
Ev babet 135 car hatiye dîtin
Raya xwe li ser vî babetî binivîsin!