دەربەن دزڵیی
پارەکە چن جارێ ڕاما کەوتە ئی یاگە حازریێ جە دەربەند دزڵیەە، نێسبەت بە یاگەکا تەری قەراخیە وەش بې پەی نیشتەی، نەختیە دەرەتانیش فرەتەرە بې.
ڕاسەکېش کاتیە دلې ماشینینە وەسېمېرە و سەرەنجوو دەور و بەریما دا پەڕ بې زوێڵ و یۊ قیزیش نێ بنیشۆرە. منیچ واتم پېسە نمەکریۊ. فرە کاتێ دەسکېشێ دڵقیەکام پەنەنێ بلمێ بەروە، بەڵام ئا جارە گېڵانی ویرم شیەێبېنې. دوێ دانێ دلقێم هاڵی کەرڎې و کەرڎېم دەسم و شنیانی کۊ کەرڎەی زوێڵەکەی. ئەر گوونیم پەنە بېیایا گېرە پەڕش کەردایا، مەجبوورە بېیانی بە پووش و چڵ و چۊڵکە ئاورم گیسنانە حەر جە وەروە زوێڵەکەی وزێنێ ملشەرە و سووچنێنش. بە چن دەقێقێ ماتڵی یەک زەڕە زوێڵما ناست و پۆختما کەردوە. دیسان ڕاما کەوتەوە دیم حەر پەڕشا کەرڎەنوە، سفرە، دلقێ، پووشەک و زاڕوڵەی، بتریێ یەک بار مەسرەفێ و فرەو چېوا تەری. دڵم گیریا. واتم داخم کەی ئی خەڵکە گنۊ یاگێ پەیشا و ژیوگای پارێزی بە ئەرکوو سەرو شانەو وېشا بزانا!؟
ئی زمسانە وېیەردە ڕاما کەوتە چەمم کەوت پی دیمەنە زەریف و بېېۋېنەیە دنیایە گەشە بېیانیوە.
بە سادەتەرین چېو ئی هونەرە زەریفە بە دەسێ ئۆستادیە حەر چا یاگێ درۆس کریا بې کەیفم کەرد. ئی جارە جە گرڎو جاران فرەتەر ڕاوېیارێ کېشێ لاو وېش، بەڵام نەک پەی زوێڵە متەی، بەڵکووم پەی وێنە گېرتەی.
دڵوو وېمەنە واچېنا هەرچی پیگەرە وېیەردایانمێ مەگەر گلەیێم کەردایانێ کاریە دەسمەنە نەخېزیێ، ئەر فرە دڵم سووچیایا بۊنەو ئانەیوە دەروو وېما پۆختەتەر بېیایا زەحمەتم بە وېم دایا و پۆختەم کەردایا.
هەزار جارێ دەسێ ئا ئوسایە وەشێ با هەکە هونەروو وېش پا شێوە نیشانەو خەڵکی دان و هەمیچ دڵوو فرە کەساش وەش کەرڎەن بە گېرتەی وێنیە چا دیمەنیە پەی یادگاری.
گوڵزار شەریفی.[1]