رۆژنامەنوس سیروان غەریب ئەحمەد لە #20-02-1976# لە ناحیەی شەتڕەی سەر بە پارێزگای ناسڕییەی باشوری عێراق لەدایکبووە، ئەمەش دوای ئەوەی بنەماڵەکەیان بە زۆرەملێی لەلایەن حکومەتی بەعسەوە ڕاگوێزراون بۆ ناوچەیە و، نیشتەجێبوونیان لە کوردستان لێ قەدەغەکراوە.
دایکی لەساڵی 1943 شاری #سلێمانی# لەگەڕەکی کانی ئاسکان لەدایکبووە، باوکی لەساڵی 1941 لە بەرزنجەی شارباژێڕ لەدایکبووە، بەڵام دواتر بەهۆی کاروبارەوە ڕوویان کردۆتە کەرکووک. سەرجەم ڕەگەزنامه و کاروباری فەڕمییان گواستۆتەوە بۆ ئه و شارە تاوەکو ڕۆژی ڕاگواستنیان بۆ باشوری عێراق.
لەساڵی 1976 بەدزییەوە لەگەڵ بنەماڵەکەی دەگەڕێنەوە بۆ سلێمانی و هەر له و شارەش نیشتەجێ دەبن.
لەساڵی 1995 یەکەم کاری ڕۆژنامەوانی لە ڕۆژنامەی ڕێگای کوردستان بڵاوبۆوە، دواتر لەڕادێوو تەلەفزێۆنی ئازادی لەشاری سلێمانی وەک کارمەندێکی ڕاگەیاندنکار دامەزرا.
دواتر لەساڵی 2000 لەگەڵ سەرەتاکانی دەرچوونی ڕۆژنامەی هاوڵاتی وەک پەیامنێری سلێمانی دەستی بەکارکردن کردووه و دواتریش تا کۆتایی ساڵی 2005 لەگەڵ ئه و ڕۆژنامەیە کاری کردووە.
لەرۆژنامەی هاوڵاتی چەندین کاری پڕ مەترسی و سەرکێشی پێسپێردراوە، وەک شەڕی ڕووماڵی یەکێتی نیشتیمانی کوردستان و ئەنسار ئیسلام و ڕووماڵی شەڕەکانی ئەمەریکاو حکومەتی بەعس لەسنوری پارێزگاکانی دیاله و شەڕەکانی موجاهدینی خەلق و پێشمەرگە لەسنوری شارەبان و سەعدییە. دواتریش لەگەڵ هێزەکانی ئەمەریکا چۆتە ناو شاری بەغداو لەوێ ماوەتەوه و چەندین دۆکۆمێنتی گرنگی موخابەراتی عێراقی بۆ ڕۆژنامەکەی پەیدا کردووە.
رۆژنامەنوس، سیروان غەریب. هەر لەگەڵ کۆنترۆڵکردنی بەغدا لەلایەن سوپای ئەمەریکاوە، ئەبو تەحسین ئه و کەسەی لەرێگەی کێشانی نەعلەکانییەوە بەوێنەی سەدام حسێن زەنگی کەوتنی ڕژێمەکەی لێدا دەدۆزێتەوه و مەترسی دۆخی بەغدای تێدەگەیەنێت و پێشنیازی بۆ دەکات بەغدا بەجێبهێڵێت و لەهەرێمی کوردستان بژێت، ئەمەش دوای ئەوەی سیروان غەریب لەرێگەی سوپای ئەمەریکییەوە ڕێژەی بەرزبوونەوەی کارە توندوتیژییەکان بەغدای دەستدەکەوێت. دواتر ناوبراو لەسەر پێشنیازەکەی سیروان غەریب بەغدا بەجێدەهێڵێت و ڕوو لەهەرێمی کوردستان دەکات و کاتێک خێزانەکەی لەکوردستان منداڵی دەبێت لەخۆشەویستیدا بۆ ئەم ڕۆژنامەنوسە، ناوی دەنێت سیروان.
- هەر لەگەڵ کارکردن لەگەڵ ڕۆژنامەی هاوڵاتیدا لەبەهاری 2003 بەشێوەی فریلانس بۆ ئاژانسی ڕویتەرز کاری کردووە.
- لەساڵی 2006 لەگەڵ هاورێکانیدا ڕۆژنامەی ئاوێنەیان دامەزراندووه و وەک ئەندامی دامەزرێنەری ئەم ڕۆژنامەیه و ئەندامی دەستەی نوسەران کاری کردووە.
- ساڵی 2006 بووە بە بەرپرسی ئۆفیسی ڕۆژنامەکە لە#هەولێر#، هەر له و ماوەیەدا کاریگەرییەکی تەواوی لەسەر ناساندنی ڕۆژنامەی ئاوێنە لەشارەکە هەبوو بەبۆنەی ڕاپۆرت و هەواڵەکانییەوە ئاستی تیراژی ڕۆژنامەکەی بەرزکردۆتەوە لەشارەکە.
- دواتر بە بڕیاری دەستەی نوسەران لەساڵی 2007 دەیگێڕنەوە بۆ ئۆفیسی سەرەکی ڕۆژنامەکە لەشاری سلێمانی و پۆستی بەرێوبەری سایتی ئاوێنەی پێدەسپێرن، بەهۆی سەرکەوتنی کارەکەیەوە تا ناوەڕاستی ساڵی 2010 بەپێی ڕیزبەندی سایتی ئەلێکسا، سایتی ئاوێنە لە عێراقدا زۆرترین خوێنەری هەبوو پلەی یەکەمی بەر نەئەدا.
- لەساڵی 2011 لەسەر داوای ڕۆژنامەنوس توانا عوسمان بەشداری کرد لەدامەزراندنی کەناڵی ئاسمانی ئێن ئاڕتی و وەرگرتنی کارمەندانی کەناڵەکە.
- لەساڵی 2011 لەسەر داوای ستافی نوسینی ڕۆژنامەی ئاوێنە، پێشنیازکرا، وێب سایتی ئاوێنە جیابکرێتەوه و بەپلەی سەرنوسەر دوبارە سیروان غەریب دابنرێتەوە، بەڵام بەهۆکاری ناکۆکی نێوان ستافی نوسین و ئیدارەی ئەوکاتەی ئاوێنە و خاوەن پشکەکان لەهەڵبژاردنی سەرنوسەردا شکستی هێنا. چونکە هەڵبژاردنی سەرنوسەر تەنها لەدەستی ستافی نوسیندا نەبوو، بەڵکو خاوەن پشکەکان بەپێی دەستوری کۆمپانیای ئاوێنە بۆیان هەبوو لەرێگەی دەنگدانەوە بەشداری بکەن. هەر له و ڕۆژەشەوە ناکۆکییەکانی نێوان ستافی نوسین و خاوەن پشکەکان و ئیدارەی ئاوێنە زیاتر قوڵتربۆوە.
- ساڵی 2014 لەسەر داوای د. بەرهەم ساڵح پۆستی سەرنوسەری وێب سایتی خەندانی وەرگرتووە تا ڕۆژی دەستبەرداربوونی لە ساڵی 2015 خەندان یەکەمین وێب سایتی پڕ خوێنەری عێراق بوو کە بەهەرسێ زمانی کوردی و عەرەبی و کرمانجی پەخشی خزمەتگوزارییەکانی دەکرد.
- لەساڵی 2015 سایتی وێستگەی دامەزراند کە ئێستا پەخشی خزمەتگوزارییەکانی بە زمانی کوردی پیشکەش دەکات.
- ئەندامی یەکەمین کۆنگرەی سەندیکای ڕۆژنامەنوسانی کوردستانە کە بەکۆنگرەی دامەزراندن ناو دەبرێت و ئێستا ئەندامی کارای ئه و ڕێکخراوەیە.
بەشداریکردن
- ساڵی 2003 بەشداری سەرجەم خول و ڕاهێنانەکانی iwpr , IKV ;کردووه و دواتریش چەندین ڕاپۆرتی لەسەر ناوچە جێ ناکۆکەکانی نێوان عێراق و هەرێمی کوردستان نوسیوە.
- ساڵی 2004 بەشداری یەکەمین خولی ڕۆژنامەوانی لە ووڵاتی ئەردەن کرد کە ئاژانسی هەواڵی ئەسوات ئەلعراق بەهاوکاری ئاژانسی ڕۆیتەرز ڕێکی خستبوو.
ساڵی 2009 بە بانگێشتی پرۆگرامێکی وەزارەتی دەرەوەی ئەمەریکا سەردانی واشنتۆنی کردووەو، بەشداربووە لە پرۆگرامی ڕۆڵی میدیا لەکۆمەڵگای ئەمەریکیدا.