بە پێی پڕۆژەیاساییەک گۆڕانکاری لە نرخی ئاو دەکرێت لە باشووری کوردستان، بەجۆرێک کە بەپێی پێوەر ئاو دەدرێت بە هاووڵاتیان و نرخی ئاویش گۆڕانی بەسەردادێت، لە کاتێکدا نرخی ئاو ئێستا لە باشووری کوردستان هەرزانترین نرخە لە هەموو جیهان.
بەپێی پڕۆژەیاساییەک کە ئێستا لە ئەنجوومەنی وەزیرانە، گۆڕانکاری بەسەر سیستمی دابەشکردنی ئاو و دیاریکردنی نرخەکەی دادێت و پێوەر بۆ هەموو ماڵێک دادەنرێت. مەسعود محەمەد، بەڕێوبەری دابەشکردنی ئاوی هەولێر بە تۆڕی میدیایی ڕووداوی ڕاگەیاند: "وەزارەی شارەوانی و گەشتووگوزار لە سەرەتای ئەمساڵ پڕۆژەیاساییەکی پێشکەش بە ئەنجوومەنی وەزیران کردووە کە بەپێی ئەو پڕۆژەیاساییە پێوەر بۆ هەموو ماڵێک دادەنرێت و دابەشکردنی ئاو بەپێی ستانداردە جیهانییەکان دەبێت".
بەپێی ستانداردی جیهانی کە ڕێکخراوی یونسکۆی سەر بە نەتەوەیەکگرتووەکان و ڕێکخراوی WHO ی جیهانی دایان ناوە، هەر هاووڵاتییەک ڕۆژانە پێویستی بە 200 لیتر و کەمتر لەو ڕێژەیەی ئاوی پاک دەبێت بۆ بەڕێوەبردنی ژیانی. لە کاتێکدا لە کوردستان ئەو ڕێژەیە 400 لیترە بۆ هەر هاووڵاتیەک و لە تورکیا 160 لیترە، لە سەرجەم وڵاتانی جیهانی پێشکەوتوو و پابەند بە سیستمە ستانداردە جیهانییەکان نرخی ئاو بە پێی قەبارەی بەکارهێنانی دیاریدەکرێت کە "مەتر چوارگۆشە ئاوە".
مەسعود محەمەد دەڵێت لە باشووری کوردستان پێچەوانەی ئەو ستانداردە جیهانییەیە بەجۆرێک دابەشکردنی ئاو بەشێوەکی هەڕەمەکییە و نازانرێت بە تەواوی هەر هاووڵاتیەک چەند ئاو بەکاردەهێنێت، هەروەها نرخەکەشی بەپێی "مەتر چوارگۆشە زەوی" دیاریدەکرێت کە هەر مەترێکی چوارگۆشە نرخەکەی 50 دیناری عێراقی دەبێت".
ئەمە لە کاتێکداییە کە ئەم نرخەی ئاو لە باشووری کوردستان هەرزانترین نرخی ئاوە لە سەرانسەری جیهان، واتە گەر ماڵێک ڕووبەری زەوییەکەی 200 مەتر چوارگۆشەبێت ئەوا نرخی ئاوی ئەو ماڵە لە مانگێکدا 10 هەزار دیناری عێراقی دەبێت. بەڵام لە وڵاتانی جیهانی نرخی ئاو بە مەتر چوارگۆشەی ئاو دیاریدەکرێت.
بە جێبەجێکردنی ئەو پرۆژە یاساییە نرخ و شێوازی دابەشکردن و بەکاربردنی ئاو لە باشووری کوردستان گۆڕانکارییەکی زۆری بەسەردادێت و ئاو کە سامانێکی نیشتمانیە کەمتر لەوەی ئێستا خەرجدەکرێت.
نرخی ئاو لە بەشێک لە وڵاتانی جیهان بە پێی مەتر چوارگۆشە
ناوی وڵات یەک مەتر چوارگۆشە ئاو
تورکیا 3 دۆلار
ئەڵمانیا 1.91 دۆلار
دانیمارک 1.64 دۆلار
هۆڵەندا 1.25 دۆلار
فەرەنسا 1.23 دۆلار
بەریتانیا 1.18 دۆلار
ئیتاڵیا 0.76 دۆلار
فیلەندا 0.69 دۆلار
ئێرلەندا 0.64 دۆلار
سوێد 0.58 دۆلار
ئیسپانیا 0.57 دۆلار
ئەمریکا 0.51 دۆلار
ئوستڕاڵیا 0.50 دۆلار
باشووری ئەفریقیا 0.47 دۆلار
کەنەدا 0.40دۆلار
باشووری کوردستان 0.05 دۆلار
- 18-07-2014