ڕۆژنیوز، دانا عومەر
کاندیدەکانی هەرێمی کوردستان کێبڕکێ لەسەر بەدەستهێنانی 46 کورسی ئەنجومەنی نوێنەرانی عێراق دەکەن.
لە هەرێمی کوردستاندا کە پارێزگاکانی هەولێر و دهۆک و سلێمانی دەگرێتەوە و پارێزگای هەڵەبجەش لەسەر پارێزگای سلێمانی ئەژمارکراوە، 503 کاندید هەیە لەسەر لیستی 25 قەوارەی سیاسیی خۆیان کاندید کردووە بۆ کێبڕکێ لەسەر46 کورسی ئەنجومەنی نوێنەرانی عێراق، کە دوو کورسیی بەپێی سیستمی کۆتا بۆ کریستیانەکان دەبێت، یەکێکیان له هەولێر و ئەوەی دیکەیان لە پارێزگای دهۆک.
کاندیدەکانی هەرێمی کوردستان 146 کاندیدیان ژن و 357 کاندیدیان پیاون، کە دەکاتە ڕێژەی 29.03 % و بەپێی سیستمی کۆتا-ش پێویستە %25 کاندیدە ژنەکان بچنە ئەنجومەنی نوێنەرانی عێراق.
له هەرسێ پارێزگای دهۆک و هەولێر و سلێمانی 3 ملیۆن و 144 هەزار دەنگدەر هەیە، هەرچەندە هەموو دەنگدەرەکان کارتی دەنگدانیان وەرنەگرتووەتەوە و لە سیستمی بایۆمەتریی ناوی خۆیان تۆمارنەکردووە، بەڵام ئەو کەسانەش دەتوانن بە کارتی دەنگدانەکانی پێشوتر دەنگ بدەن و ئەو کەسانەشی کارتیان نییە بێبەش دەبن لە دەنگدان.
لە پارێزگای سلێمانی 26 حزب و هاوپەیمانیی کێبڕکێ لەسەر بەدەستهێنانی 18 کورسی پەرلەمانی دەکەن، کە 211 کاندید خۆیان بۆ بەدەستهێنانی ئه و 18 کورسییە کاندید کردووە به و پێیەش 193 کاندید چانسی بەدەستهێنانی کوردسییان نییە.
هەر لە پارێزگای سلێمانی بێجگە لە پارتەکانی هەرێمی کوردستان، ڕەوتی حیکمه.، کە عەمار حەکیم سەرۆکایەتی دەکات، 16 کاندیدی هەیە کە سەرجەمیان کوردن، هاوپەیمانی نەسر، کە حەیدەر عەبادی سەرۆکایەتی دەکات 9 کاندیدی هەیه، کە 7 کاندیدیان کوردن.
لە پارێزگای هەولێر 27 حزب و هاوپەیمانی بەشداری هەڵبژاردن دەبن، کە 173 کاندید کێبڕکێ بۆ بەدەستهێنانی 16 کورسی پەرلەمانی دەکەن، به و پێیەش 157 کاندید چانسی بەدەستهێنانی کورسیان نابێت.
لە پارێزگای دهۆک 24 حزب و هاوپەیمانی بەشداری هەڵبژاردن دەبن، کە 115 کاندید کێبڕکێ بۆ بەدەستهێنانی 12 کورسی دەکەن، بەوپێیەش 103 کاندید چانسی بەدەستهێنانی کورسیان نییە.
واتا بە گشتیی457 کەسیان چانسی بەدەستهێنانی کورسی پەرلەمانیان نییە.
هەرچەندە، ئەو زانیارییانە لە نووسینگەکانی کۆمسیۆنی باڵای هەڵبژاردنەکانی عێراق لە سلێمانی و هەولێر وەرگیراون، بەڵام جیاوازیی لە ژمارەی گشتیی کاندیدەکان و ژمارەی کاندیدەکان بەپێی پارێزگاکان هەیە.
بەپێی دابەشکاریی پارێزگاکان، کە لە سلێمانی 211 کاندید و هەولێر 173 و دهۆک 115 کاندیدن، کۆی گشتیی کاندیدەکان 499 کاندیدە، بەڵام کۆمسیۆن دەڵێت، 503 کاندید هەیە، بۆ ڕاستکردنەوەی زانیارییەکانیش چەندین جار پەیوەندیمان بە هەردوو نووسینگەوە کرد، پێمانڕاگەیەندرا، کە دوای بەدواداچوون وەڵاممان دەدەنەوە، بەڵام هیچ وەڵامێکیان نەداینەوە.[1]
#20-04-2018#