د. عەلی شەریعەتی
وەرگێڕانی: لوقمان ئەمین
چاپی یەکەم 2018
بابەتی کتێبەکە لەسەرەتای تا کۆتایی تەئکید لەسەر دووخاڵ دەکاتەوە کە ئەوانیش بریتین لە:
1 ڕۆشنبیری کۆپیکراو بە ڕۆشنبیری ڕۆژئاوایی و ئەوروپی.
2 ڕەخنەگرتن لە ڕۆشنبیران بەوەی کە بەبێ ڕەچاوکردنی بارودۆخی کۆمەڵایەتی کۆمەڵگە دەست دەکەن بە ڕەخنەگرتن لە دین.
نووسەر تێیدا بەتەواوی هەردوو جۆرە ڕۆشنبیرەکە ڕەد دەکاتەوە و پێی وایە سەرچاوەی هەموو کارەساتەکان لەو دوو لایەنەوە سەرچاوەیان گرتووە!
سەبارەت بەخاڵی یەکەم:
شەریعەتی پێی وایە کۆمەڵگەی ڕۆژهەڵاتی بەتەواوەتی جیاوازە لە کۆمەڵگەی ڕۆژئاوایی و هەریەکەیان تایبەتمەندی خۆی هەیە، ئەمە ڕاستییەکی حاشاهەڵنەگرە و جێگەی مشتومڕ نیە، بەڵام سەبارەت بەوەی کە نابێت ڕۆشنبیرانی ئێمە بەهەمان شێوەی ئەوانەی ڕۆژئاوا ڕەخنە بگرن ئەوا شەریعەتی درکی بەوە نەکردووە کە سەرەڕای جیاوازی و تایبەتمەندی هەریەکە لەو دوو کۆمەڵگەیە هێشتا ئەو کێشانەی کە بەرۆکی کۆمەڵگەی ڕۆژهەڵاتیێان گرتووە هەمان ئەو کێشانەن کە لە ڕابردوودا و لەسەردەمەکانی پێشتردا ئەوروپا و ڕۆژئاوا پێوەیان دەناڵاند وەک (توندڕەویی ئاینیی، جیاکاری ڕەگەزی، توندوتیژی و سووکایەتی بە ژنان، بە کۆیلەکردنی تاکەکان بە ئامڕازی جیاواز و بەرتەسککردنەوەی ئازادی تاکەکەس، ڕێگەنەدان بە ڕەخنە گرتن و ئازادی دەربڕینی بیروڕا و هتد...) [1]