هەیام لەوکاتەدا کە لەگەڵ دایکی لەسەر زەوییە کشتوکاڵییەکەیان بوو، بە گوللەیەکی دەمانچە کۆتایی بە ژیانی خۆی هێنا. ئێستا کەسوکارەکەی دەپرسن، هەیام ئەو دەمانچەیەی لە کوێ دەستکەوت.
رۆژی 5/11/2018 کچێکی تەمەن 17 ساڵ بەناوی هەیام ئەلیاس، دانیشتووی کەمپی مام ڕەشان لە شارۆچکەی شێخان، بە دەمانچەیەک خۆی کوشت.
رائید هێمن سلێمان، گوتەبێژی پۆلیسی #دهۆک# بە (رووداو)ی گوت: دەستمان بە لێکۆڵینەوە لە ڕووداوەکە کردووە، تا لێکۆڵینەوە تەواو نەبێ هیچ شتێک ئاشکرا ناکەین.
هەر لەوبارەوە شێرۆ هەرکی، بەرپرسی کەمپی مام ڕەشان بە(رووداو)ی گوت: کەسوکاری هەیام زۆر هەژارن، باوکی نەخۆشە و لە نێو جێگەدا کەوتووە، ئەوان نزیکەی 7 مانگە هاتوونەتە کەمپەکەمان، لێرە لە زەوییەکی کشتوکاڵی کاریان دەکرد.
شێرۆ باسی خۆکوشتنی ئەو کچەی کرد و گوتی: سەعاتێک دوای ڕووداوەکە هەواڵیان پێدام کە کچێک لە کەمپەکە خۆی کوشتووە، ئەوە یەکەم حاڵەتی خۆکوشتنە لەناو ئەم کەمپە ڕووبدات. ئەو کچە هیچ کێشەیەکی نەبوو، نازانین ئەو دەمانچەیەی لە کوێ هێناوە، چاوەڕێی تەواوبوونی لێکۆڵینەوەی پۆلیسین.
دایکی هەیام کە بەهۆی ڕووداوەکەوە شۆک بووە، لەو ڕۆژەوە هیچ قسەیەک ناکات و لە خێوەتەکەشیان نایەتە دەرەوە.
ئەلیاس خەیری باوکی هەیام کە ماوەیەکی زۆرە بەهۆی لەکارکەوتنی گورچیلەیەکی لەسەر جێگا کەوتووە، باسی کچەی بۆ (رووداو) کرد و گوتی: هێشتا باوەڕ ناکەم ئەو کارەی کردووە، چۆن دڵی هات باوکێکی نەخۆش و دایکێکی پیری وا جەرگسووتاو بکات، ئاخر هیچ کێشەیەکی نەبوو، قەت دڵمان نەشکاندووە، زۆر بە ناز پەروەردەمان کردووە.
سەبارەت بە ڕۆژی ڕووداوەکەش، باوکی هەیام گوتی: ئەو ڕۆژە کە لە خەو هەڵسا، داوای لە دایکی کرد دوای نیوەڕۆ لەگەڵی بچێت بۆ کار بۆ ئەوەی یارمەتی دایکی بدات. یەکەمجار بوو هەیام داوای شتێکی وا بکات، زۆر هەوڵمان لەگەڵ دا نەچێت، بەڵام هەر سووربوو لەسەر ئەوەی لەگەڵ دایکی بچێت.
وەک ئەلیاس باسی کرد، کچەکەی پێش ئەوەی بڕوات، باوەشی لێداوە و ماچی کردووە. ئەلیاس دەڵێت: ئەگەر دەمزانی ئەوە دوایینجارە کچەکەم لە باوەش دەگرم، هەرگیز ڕێگەم نەدەدا بڕوات، ئەو تاقانەی دڵم بوو، بۆچی وای کرد، چۆن باوکە نەخۆشەکەی جێهێشت؟.
حەسەن خەیری کە مامی هەیامە، دەڵێت :من لە کەمپەکە بووم، هەواڵیان بۆ هێنام و گوتیان برازاکەت لە دەرەوەی کەمپ گوللەی لەخۆی داوە، بەپەلە ڕامکرد بۆ شوێنەکە وامزانی بریندارە، گوتم دیارە بەهەڵە تەقە کراوە، چونکە ئێمە دەمانچەمان نییە، چۆن پەیدای کردووە؟ شوێنەکە پێنج خولەک لە کەمپەکە دوور بوو، کە گەیشتم بینیم هەیام لە نێو خوێنی خۆیدا کەوتووە.
خەمی حەسەن ئەوە بووە کە چۆن ئەو هەواڵە بە برا نەخۆشەکەی بڵێت.
حەسەن دەڵێت: نەمزانی چۆن پێی بڵێم کە هەیام خۆی کوشتووە، چوومە کەمپەکە، ئەلیاس گوتی وەرە دانیشە، ئێستا هەیام و دایکیشی دێنەوە. ئەمڕۆ هەیام چووە یارمەتی دایکی بدات. کە گوێم لەناوی هەیام بوو خۆم پێڕانەگیرا و دامە پڕمەی گریان. ئەلیاس وایزانی دایکی هەیام شتێکی بەسەرهاتووە. بەڵام ناچاربووم پێمگوت کە هەیام خۆی کوشتووە. کە گوێی لەو قسەیە بوو یەکسەر لە هۆش خۆی چوو.
کەسوکاری هەیام دەڵێن ئەوان هیچ جۆرە چەکێکیان لە ماڵەوە نییە، ئەوەی ئەوانی سەرقاڵ کردووە، ئەو پرسیارەیە کە هەیام ئەو دەمانچەیەی لە کوێ دەستکەوتووە، کێ پێیداوە. بۆ دەستکەوتنی وەڵامی ئەو پرسیارە چاوەڕێی تەواوبوونی لێکۆڵینەوەی پۆلیس دەکەن.[1]
#14-11-2018#