نامق هەورامی
2019
دمای پژگیای ویرم چانەیە کەردۆ جیاوازی کەرونە شێوەو نویستەیەنە ، چا ماوەنە تاوام بڕێ کارێ جیاوازێ کەرو ، نموونەو ئا کارا ئینا دەفتەرێ تەرەنە بەنامێ ( تەنیاییم پژگیان).
نویستەی هۆنێوی درێژێ ئاسان نییا ، دلێ ئەدەبی تازەی هۆرامییەنە وەڵتەر نەبیەنما ، پەوچی هەستم کەرد متاومێ ئانەیچە کەرمێ.
(بێتۆیم کۆتەن سارا) هەناسێوی درێژا بەڵام کەمێ پێچ و لۆچێش فرێنێ ، مزانو وانیاری ماننۆنە ، بەڵام دماجار لەزەتێ وەشش مدۆ پەنە.
دنیاو ئارۆینە و دلێ هامسایەکاچمانە زوان ڕوەو سادە بیەی ملۆنە ، باوەڕم پانەی هەن زەریفی نویستەی کارش نیا بە سەختگیری زوانی، تاومێ بە زوانێ سادە نویستێوی دڵنشین دەیمێ وانیارەکاما.
ئەگەر تاوابۆم جیایێ چەنی ( پژگیا)ی باروەنە ئینە کارێ خاسا، چون فرەو ئازیزا بەردەوامی ئی شێوە نویستەیشا پەنە خاس بێ.
هیوادارەنا تاوابۆم کارێ خاسم پەی زوان و فەرهەنگو هۆرامانی کەردەبۆ...
هیوادارەنا پی زوانە بیاوۆ وەردەسو وەردەنگەکا و ئاکەسایچە بە عەشقۆ هۆنیاکا من مواناوە و ئانێچە ئینێ خەمو ئەدەبیاتو هۆرامانیەنە. [1]