لە بەڕێوەبەرایەتیی پەروەردەی #شنگال#، یەک ملیار و 98 ملیۆن دینار دیارنەماوە، بەپێی بەدواداچوونێکی ڕووداو ئەو پارەیە بەشێکی دراوە بە هەندێک کەس کە دەوامیان نەکردووە و بەشێکی دیکەشی بە لیستی وەهمی دابەشکراوە.
وەزیری پەروەردە لە پەرلەمانی کوردستان باسی گەندەڵییەکەی لە سنووری پەروەردەی #دهۆک# کرد، کە چوار کەس تۆمەتبارکراون بە دروستکردنی لیستێکی ناڕاستی وانەبێژان بۆ ساڵی خوێندنی 2018-2019 و بردنی ملیارێک و 98 ملیۆن دینار، سێ کەسیان دوای دەستگیرکردنیان بە کەفالەت ئازادکراون و کەسی چوارەمیش بەهۆی نادیاریی شوێنەکەی تاوەکو ئێستا دەستگیرنەکراوە.
عومەر عەلی، بەڕێوەبەری گشتیی پەروەردەی دهۆک لەوبارەیەوە ڕایگەیاند، بەدرێژایی ساڵێک لیستی وانەبێژان نادروست بووە، چونکە ناوی وەهمی و قوتابخانەی وەهمیی تێدابووە.
بەڕێوەبەری نوێی پەروەردەی شنگال داوای لێکۆڵینەوە لە دۆسیەکە دەکات چونکە چارەنووسی 22 مامۆستا و فەرمانبەر پەیوەندیی بەو دۆسیەیەوە هەیە.
لە سنووری پەروەردەی شارۆچکەی شنگال، 565 وانەبێژ هەن کە مانگانە 100 ملیۆن و 230 هەزار دیناریان بۆ تەرخاندەکرێت، ئەمەش لەبری هەزار و 612 مامۆستا و فەرمانبەرە کە سەرپەرشتیی 60 قوتابخانەی کوردی لە سنووری قەزاکە و ناو کەمپی ئاوارەکان دەکەن.
دوای ڕووداوەکانی شنگال و ئاوارەبوونی خەڵک، کەمیی میلاکی مامۆستایان لە زۆربەی قوتابخانەکان هەبوو، بەو هۆیەشەوە ژمارەیەکی بەرچاو لە مامۆستایان دەستیان لە کارەکانیان هەڵگرت و چوونە دەرەوەی وڵات، لەجێگەی ئەوانیش وانەبێژ دانران.[1]
#08-05-2020#