دیسانەوە هەمان قەوان...!!!؟؟
(هەڵوەستەیەک لەمەر دروشمەکانی حکومەت لەمرۆدا)
کنێر عەبدوڵڵا[1]
ئەمرۆ یەکەم ڕۆژی دەستپێکی هەڵمەتە کە بە بۆنەی ڕۆژی جیهانی بەرەنگاربونەوەی توندوتیژی دژ بە ژنان لە سەرتاسەری جیهاندا ماوەی 16 ڕۆژ بەردەوام ئەبێ، کە ئامانج لێی نەهێشتن و کەمکردنەوەی جۆرەکانی توندوتیژییە کە ڕووبەرووی ژنان دەبێتەوە، بەڵام ئەوەی جێی تێرامانە دیسانەوە قەوانەکان خۆی دووبارە دەکاتەوە و بەرپرسە باڵاکانی حکومەت و حزب و پەرلەمان لە ووتارو قسەکان و دروشمەکانیاندا دووبارە؛ وەک پیشەی هەمیشەیی ساڵانی ڕابردوو دەڵێن : دژی هەموو جۆرە توندوتیژییەک لە بەرامبەر ژنان دەوەستینەوە، وەک هەمیشە پابەندین بە پشتیوانیکردن و پاراستنی مافەکانی ئافرەتان، پابەندبوونی حکومەت بۆ پشتیوانیکردنی مافەکانی ئافرەتان و نەهێشتنی هەموو جۆرە توندوتیژییەک دووپاتدەکەینەوە، و حکومەت کاردەکات بۆ ڕەخساندنی زەمینەیەکی لەبار کە ئافرەتان تێیدا پارێزراو و گەشە بکەن
ئەمانەو چەندینی تر؛ ساڵانە و نزیکەی ماوەی 30 ساڵی حوکمرانییە لە تیڤی و ڕۆژنامەو گۆڤارو یادەکاندا گوێبیستی ووشەو ڕستە و بەڵێن و قسەی ڕەونەقدار ئەبینەوە؛ تا ئەو ڕادەیەی هەندێ جار ئێمەی ژنان لەلایەک دەکەوینە پرسیار لە خۆمان بەوەی جیاوازی گوتاری ئێمەو ئەو دەسەڵاتدارانە چییە یان دەکەوینە گومان لەخۆمان بەوەی ئایا خەتابارو کاربەدەستان و بریاردەران داخۆ ئێمەبین یان ئەوان??!!
کاری حکومەت ئەوە نیە لە هاوشێوەی ئەم بۆنانەدا دروشمەکان ساڵانە وەکیەک بڵێتەوە؛ بێ ئەوەی بکۆڵێتەوە لە ناوەرۆک و قوڵایی واتاکان و جیاوازی ووشەکانی لە نێوان ساڵەکاندا؛ بەڵکو ئەرکی ئەوەیە بوەستێت لەسەر ئامارەکانی ئەمساڵ بەبەراورد ساڵانی ڕابردوو و خۆی بەراوورد بکات و بزانێ لەکوێدایەو لەکوێی ووڵاتانی تردایە? لێکۆلینەوەی جدی بکات و لەرێی بەرێوەبەرایەتییەکانی توندوتیژییەوە کە ساڵەهای ساڵە دامەزراوەو بزانێ هۆکارەکان و داتاکان و هۆشیارییەکانی دامەزراوەکانی بەپێی چ پلان و بەرنامەیەک درێژە بە کارەکانیان دەدەن و خزمەتەکانیان لە چ ئاستێکدا لەخزمەتی ئامانجی دامەزراندنەکەوە بوە? با لەرێی توێژینەوەی زانکۆکانێوە بزانێ چ هەڵوەستەیەکی جدی گیراوەتەبەر بۆ دۆزینەوەی ڕێگەچارەی جدی لەمەر کەمکردنەوەی توندوتیژییەکان? با لەرێی دادگاکانەوە بەدواداچون و چاودێری هەبێ و بزانێ ئاخۆ ڕۆژانە بۆ ئەوەنە کوشتن و قوتاربوونی بکوژانی ژنان و ئەنجامدەرانی توندوتیژی وەک بەرزەکی بانان بۆی دەرئەچن و ئیدی بێباکانە بکوژو ببر خۆیان دەبن?? با وەک حکومەت بزانن دۆخی شێلتەرەکان لە چیدایەو چۆن ئەو کەیسانە و بە چ شێوەیەک دەگەرێنەوە نێو باوەشی کۆمەڵ? با بزانێ ڕێکخراوەکانی ژنان بەدرێژایی کارکردنیان بونەتە خاوەنی ئەزمون و پسپۆر لە کارەکان و تێگەیشتنی زیاتر لە واقعی کێشەکان و لەو ڕوانگەیەوە بێلایەنانە پلانی هەبێ بۆ دروستکردنی لینک و ڕاگۆرینەوە و سوودوەرگرتن لە ئەزمون و شارەزاییەکانیان ? دواجار خوێندنەوەی بێلایەنانەو ئەکادیمیانە بکە بۆ عەقل و مامەڵەی کارمەندانی بنکەکانی پۆلیس و دەزگا پەیوەندیدارەکانی تر لەگەڵ ئەو سکاڵاکەرانەی ژنان و ئەو کەیسانەی ڕویان تێدەکەن و بزانن چیان پێدەوترێ و چۆن مامەڵەیان لەگەل ئەکرێ?!
ئەو کات وەرەوە نێو باسی پرۆژەکانی کە پێویستن بکرێ و چۆن و بەکێ و بە چ شێوازێک تا دواتر ساڵێکی تر هەمان خواست و ئارەزوو و حەز نەخوازی؛ وەک حکومەت و لایەنی کەمیش جیاوازی بکرێ لە نێوان کاری ڕێکخراوەکان و حکومەتدا.. تا چیتر واقعی داتاکان ڕاستگۆیانە پێمان بڵێ ئێمە لە کوێی دونیایان، و تا پرۆژەکان بەگشت وەڵامدەرەوەی کارو بەرپرسیارێتییەکانی حکومەت بێ؛ نەک دروشم و قسەکان.
ئیتر بە لایەنی کەم واقع و قسەکانی ساڵێکی تریش؛ وەک ئەمساڵ خۆی دووبارە نەکاتەوە..
کوردیپێدیا جە دلېنەو ئی بابەتۍ ۋەرپەرس نېیەن، خاۋەنو/خاۋەنۊ بابەتەکۍ ۋەرپەرسیارەن. کوردیپێدیا بە مەبەسو ئەرشیڤکەرڎەی ئی بابەتېشە تۊمارە کەرڎېنە.
ئی بابەتۍ بە زۋانی (کوردیی ناوەڕاست) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
ی کلیک کەرە!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
ئی بابەتۍ 659 جارۍ ۋینیێنە
پەیلۋاو وېت چە بارەو ئی بابەتۍ بنۋیسە!