Navê pirtûkê: Dengê Kurdistanê: Diwan I, Evîna Welat
Navê nivîskar: Abdurrahman Durre
Cihê çapkirina pirtûkê: İstanbul
Navê çapxaneyê: Melsa
Sala çapê: 1992
[1]
Felek kanê hevala min, kûda çû wan demên xweş ka?
Kuda çû çav xezala min, şepala dêmgûla geş ka?

Çi bû ka war û zozanê, welatê Serhedê kanê?
Birindar im ji Lozanê, gelo roja şevareş ka?

Di sala jenosîda (qirkirina) Geliyê Zîlan de (1930), li navçeya Milazgira Mûşê, li gundê Kêranlixê hatiye dinê.
Panzdeh (15) salan di medresên Kurdistanê de xwendiye. Li dora deh-donzdeh salan jî seydatî (muderîstî) kiriye. Ji bil zimanê xwe yê dayikî, zimanên Erebî, Farisî û Tirkî rind dizane, hinek jî Ingilîzî fêm dike. Di wêje (edebiyat) û rêzimana Erebî, Farisî û Kurdî de zanyar e. Bi taybetî di wêjeya Kurdî de hozan e.
Ji sala 1962’an heta sala 1975’an miftîtî kiriye. Di navbera salên 1980-83’an de, li Libyayê, bajarê Trîpoliyê wergêrîtiya (Mutercimiya) Erebî û Tirkî kiriye.
Ji roja ku ber bi fêmî xwe bûye û doza Kurd û Kurdistanê fêm kiriye, heta îro, serê wî di teqereq û gêjahiyan de bûye, zilm û zor û tadayî dîtiye; ketiye heps û zîndanan. Ew zilm û bêdadî heta îro jî dom dikin.
Bi zimanê Kurdî, Erebî, Farisî û Tirkî deh berhemên wî yên çapkirî û neçapkirî hene.
Endamê koma nivîskarên rojnama Welat û kovara Rewşenê ye; endamê saziya sazûmankarên Enstîtuya Kurdî ya li Stenbolê ye, serokê komisyona edebiyata Kurdî ye.