رووداو دیجیتاڵ

بەڕێوەبەری پڕۆگرامی پێدانی وڵاتینامە لە ڕێگەی وەبەرهێنانەوە لە دۆمینیکا CBI، بە تۆڕی میدیایی ڕووداوی ڕاگەیاند، ئەوان بە گومانی بوونی ساختەکاری لە بەڵگەنامەکانی ئەو هاووڵاتییانەی لە هەرێمی کوردستان و عێراقەوە داوای وڵاتینامە و پاسپۆرتی دۆمینیکا دەکەن، هەروەها بەهۆی ڕێکلامکردنی نەگونجاو و مامەڵەکردنی هەندێک نووسینگە لە هەرێمی کوردستان و عێراق بە وڵاتینامە و پاسپۆرتی دۆمینیکاوە، بۆ ماوەیەکی کاتی ئەو پڕۆگرامەیان لە هەرێمی کوردستان و عێراق ڕاگرتووە.

ئیمانوێل نانتن، بەڕێوەبەری پڕۆگرامی پێدانی وڵاتینامە لە ڕێگەی وەبەرهێنانەوە لە دۆمینیکا ڕۆژی 21ی حوزەیرانی 2022 هەڤپەیڤینێکی لەگەڵ ڕۆژ عەلی زاڵە، نێردراوی ڕووداو لە دۆمینیکا کردووە، کە تێیدا ئاماژەی بەوە دا، هەزاران کەسی خەڵکی هەرێمی کوردستان و عێراق بوونەتە هاووڵاتیی دۆمینیکا.

دەقی هەڤپەیڤینی ڕووداو لەگەل ئیمانوێل نانتن:

رووداو: هۆکاری ئەو بڕیارە چی بوو بۆ دەرهێنانی کوردستانی عێراق لە پڕۆگرامی وڵاتینامە لە ڕێگەی وەبەرهێنانەوە CBI؟

ئیمانوێل نانتن: سەرەتا ڕۆژباش و بەخێربێن بۆ دۆمینیکا. ئێوە کە لەو ڕێگە دوورەوە هاتوونەتە ئێرە مانای ئەوەیە کە ئەمە پرسێکی گرنگە بۆ ئێوە و خەڵکی کوردستان. من دەمەوێ سوپاسیان بکەم بۆ پشتیوانیکردنیان لە پڕۆگرامەکە لە ڕابردوودا. ئێمە ئەم پڕۆگرامەمان لە ساڵی 1993ەوە هەیە. بۆ ئێمە و ئەو کارەی دەیکەین وردبینی زۆر گرنگە، بۆیە وردبینییەکی زۆر بەهێزمان هەبووە، هەندێکجاریش پێداچوونەوە بۆ ئەو پرۆسە وردبینییە دەکەین، ئەوەش بە هاوکاریی ژمارەیەک ڕێکخراوی نێودەوڵەتی وردبینیکردن و هەروەها هاوبەشە نێودەوڵەتییەکانمان کە لە زانیارییە هەواڵگیرییەکانمان دەڕوانن. لەوانەیە هەندێکجار هەندێک خاڵ هەبن کە جێگەی نیگەرانی بن، بۆیە ڕادەوەستین و پێداچوونەوەیان بۆ دەکەین. لە ماوەی ڕابردوودا پشتیوانییەکی زۆرباشمان هەبووە لە خەڵکی کوردستان و عێراقەوە، ژمارەیەکی زۆر لە خەڵکی ئەو ناوچەیە بوونەتە هاووڵاتیی دۆمینیکا، لە ڕاستیدا هەزاران کەس لەوان بوونەتە هاووڵاتیی دۆمینیکا. ئێمە زۆر بەوە خۆشحاڵین و سوپاسیشیان دەکەین. ئێستا هەندێک نیگەرانی هەن و ئێمەش هەندێک پێداچوونەوە دەکەین بۆ ئەوەی دڵنیابین لەوەی کە پرۆسەی وردبینی کاری خۆی دەکات و هەروەها دڵنیابینەوە لەوەی ئەو خەڵکەی داوای وڵاتینامە و پاسپۆرت دەکەن، دروست خۆیانن. لەگەڵ سەرکەوتنی پڕۆگرامەکە، کۆمەڵێک خەڵک دەردەکەون کە خۆیان وەک بریکار پێشاندەدەن. ئێستا ژمارەیەک خەڵک بەشداری دەکەن لە ڕێکلامکردن بۆ بەشداریکردن لە پڕۆگرامی وڵاتینامە لە ڕێگەی وەبەرهێنانەوە، لەکاتێکدا خۆیان بریکاری ڕێگەپێدراو نین و ڕێکلامەکانیان بەشێوەیەکە لەگەڵ شێوازی بانگەشەی ئێمە بۆ پڕۆگرامەکەمان ناگونجێت. پڕۆگرامی وڵاتینامە لە ڕێگەی وەبەرهێنانەوە پڕۆگرامێکی زۆر باڵایە و بۆ ئەو کەسانەیە کە خاوەنی سەرمایەیەکی زۆرن، ئەو کەسانەش کە لەو پڕۆگرامەدا بەشداری دەکەن دەبێ خەڵکانی سەرکەوتووبن و خاوەنی نێوبانگێکی باش بن. کەچی ئێستا دەبینین ئەو ڕێکلامانەی لەو ناوچەیە دەکرێن لە ڕێگەی نامەی مۆبایل و فەیسبووکەوە بەشێوەیەکن کە ئێمە ناخوازین بەوشێوەیە بناسرێین. بۆیە ئێستا پێداچوونەوە دەکەین و پڕۆگرامەکە ڕادەگرین و لێکدانەوەیەکی تەواو دەکەین بۆ ئەوەی بزانین چۆن بتوانین بەردەوام بین. ئێمە پڕۆگرامەکە دەستپێدەکەینەوە لەدوای ئەنجامدانی لێکۆڵینەوەیەکی تەواو و دڵنیابوونەوە لەو کەسانەی وەکو بریکار خۆیان دەناسێنن، چونکە ژمارەیەکی زۆر خەڵک ئێستا خەریکی ئەو کارەن، لە کاتێکدا لای ئێمە وەکو بریکار تۆمارنەکراون، خەڵکیش دڵنیانین لەوەی کە کێ بریکارێکی ڕێگەپێدراوە و کێ ڕێگەپێنەدراوە. ئێمە دەمانەوێ ئەو گرفتانە چارەسەربکەین، کاتێک پرۆسەکە کۆتاییهات و هاوبەشەکانمان دڵنیابوون لە ئەنجامی پرۆسەکە، ئەو کات پڕۆگرامەکە دەستپێدەکەینەوە. ئەمە مانای ئەوە نییە ئێمە شتێکمان هەبێ لە دژی خەڵکی ئەو ناوچەیە، لە ڕاستیدا هەزاران هاووڵاتیی دۆمینیکا خەڵکی ئەو ناوچەیەن و خۆشحاڵین لەو چەند ساڵەدا لە پڕۆگرامەکەدا بەشدارییان کردووە و هاووڵاتیی دۆمینیکان.

رووداو: ئەوە یەکێک بوو لە پرسیارەکانم لە ڕاستیدا، تۆ دەڵێیت هەزاران کەس، ئایا هیچ ژمارەیەکت لەبەردەستە چەند کەس لە هەرێمی کوردستانەوە لێرە هاووڵاتین؟

ئیمانوێل نانتن: ژمارەیەکی دیاریکراوم لەبەردەست نییە، ئێمە ژمارەی هیچ ناوچەیەک بڵاوناکەینەوە و ئاشکرای ناکەین، ژمارەکەمان هەیە، بەڵام ئێستا لەبەردەستم نییە. دەتوانم بڵێم ژمارەیەکی زۆر لە خەڵکی ئەو ناوچەیە وڵاتینامەیان هەیە و خۆشحاڵین بەوەی کە ئەوان هاووڵاتیی باشی دۆمینیکان.

رووداو: نیگەرانییەکانی ئێوە تەنیا پەیوەستن بە بازاڕکردن و ڕێکلام بۆ پڕۆگرامەکە یاخود نیگەرانیی دیکەشتان هەیە کە بوونەتە هۆکاری ڕاگرتن و پێداچوونەوە؟

ئیمانوێل نانتن: هەروەکو باسمکرد بانگەشە و ڕێکلامکردن یەکێکە لە هۆکارەکان، بەڵام لە هەمانکاتدا وردبینیش گرنگە. کۆمپانیاکانمان خۆشحاڵ نین بە هەندێک لەو شتانەی کە لەوێ ڕوودەدەن، بۆیە پێداچوونەوە دەکەین و ناچار دەبین پڕۆگرامەکە ڕابگرین تاوەکو ئەو شتانەی کە ئێمە پێیان ڕازی نین لادەبەین و ئەوکات دووبارە دەستپێدەکەینەوە.

رووداو: با ڕاشکاوانەتر قسە بکەم، من بیستوومە کە بەڵگەنامەی ساختە یەکێک بووە لە هۆکارەکانی ڕاگرتنی پڕۆگرامەکە. ئایا هیچ بەڵگەنامەی ساختە لە هەرێمی کوردستانەوە بووەتە هۆکاری ڕاگرتنی پڕۆگرامەکە؟

ئیمانوێل نانتن: بەڵێ ئەوە یەکێکە لەو شتانەی کە کۆمپانیاکانی وردبینی ئێمەیان لێ ئاگادارکردەوە و دەڵێن دڵنیا نین لە هەندێک لەوانەی لەو ناوچەیەوە دێن. بەڵێ ئەوە یەکێکە لە هۆکارە سەرەکییەکان.

رووداو: لەکاتی پرۆسەی پێداچوونەوەدا، چ دەکەن لەوانەی کە پێشتر بوونەتە هاووڵاتیی دۆمینیکا؟ ئایا پێداچوونەوە بۆ ئەوانیش دەکەن؟ یاخود تەنیا ئەو کەسانە دەگرێتەوە کە داواکاریی نوێ پێشکێش دەکەن؟

ئیمانوێل نانتن: تەنیا ئەو کەسانە دەگرێتەوە کە داواکاریی نوێ پێشکێش دەکەن، ئەوانە ناگرێتەوە کە بوونەتە هاووڵاتی. سەبارەت بە بەڵگەنامە ساختەکانیش زۆربەیان لەلایەن کۆمپانیای وردبینییەوە ئاشکراکراون و ئێمەش دەمانەوێ لەو بابەتە دڵنیابینەوە. ئەوانەی کە بوونەتە هاووڵاتیی دۆمینیکا، هەر بەوشێوەیە دەمێننەوە و ئازادن وەکو هەر هاووڵاتییەکی دیکەی دۆمینیکا.

رووداو: ئەو بەڵگەنامە ساختانە، ژمارەیەک هەیە کە بتوانی باسی بکەی؟

ئیمانوێل نانتن: نەخێر، نەخێر، نەخێر

رووداو: کەواتە ناتوانی باسی بکەی.. باشە گوتت کە دەستپێدەکەنەوە، ئایا کاتێکی دیاریکراو هەیە بۆ دەستپێکردنەوەی پڕۆگرامەکە؟

ئیمانوێل نانتن: کاتێکی دیاریکراو نییە. کۆمپانیاکانمان داوایان کردووە ماوەیەکیان پێبدەین بۆ ئەوەی بە پرۆسەکەدا بچنەوە و پێشنیازی خۆیان بۆ ئێمە ئامادە بکەن. ئەوە ئێستا بەردەوامە و هیوادارین زۆر کاتی پێویست نەبێت، لەوانەیە لە ماوەی چەند مانگێکدا دووبارە دەستپێبکەینەوە، بەڵام دەمانەوێ ئەوانەی داواکاری پێشکێش دەکەن زۆر ئاگاداربن لەگەڵ کام بریکار مامەڵە دەکەن، چونکە دەمانەوێ دڵنیابین لەوەی ئەو کەسانەی بانگەشە بۆ پڕۆگرامەکەمان دەکەن، بەوشێوەیە دەیکەن کە ئێمە خۆمان دەیکەین. وڵاتینامە و پاسپۆرت لە ڕێگەی وەبەرهێنانەوە پڕۆگرامێکی باڵایە و ڕێکلامکردن بۆی بەشێوەیەکی نەگونجاو لای ئێمە ڕێگەپێدراو نییە.

رووداو: ئایا هیچ بریکارێکی ڕێگەپێدراوتان لە هەرێمی کوردستان و عێراق هەیە؟ ئایا دەتانەوێ تەنیا یەک بریکاری ڕێگەپێدراو هەبێت؟

ئیمانوێل نانتن: ئێمە چاوەڕێی کۆمپانیاکانی وردبینی دەکەین بۆ ئەوەی پێشنیازی خۆیان بکەن و ئێمەش بۆ هەر پێشنیازێک ئامادەین. ئێمە دەمانەوێ دڵنیابین لەوەی ئەوانەی ڕێکلام بۆ پڕۆگرامەکە دەکەن ساختە نین و لای ئێمە وەکو بریکاری ڕێگەپێدراو دەناسرێن.

رووداو: لە پرۆسەی پێداچوونەوەکەتاندا، چۆن دڵنیا دەبنەوە لەوەی کێ هاونیشتمانیی هەرێمی کوردستانە؟ ئێوە لە بڕیارەکەتاندا ناوی چەند شوێنێکی دیاریکراوتان هێناوە وەکو هەولێر و سلێمانی. بەڵام ئەگەر کەسێک هاونیشتمانیی هەرێمی کوردستان بێت و لە بەغدا لەدایکبووبێت، ئایا دەتوانێ ئێستا داواکاری پێشکەش بکات؟

ئیمانوێل نانتن: پێموایە ئێمە زۆر ڕوون بووین لە دیاریکردنی ئەو ناوچانەی جێگەی نیگەرانین، چونکە کۆمپانیاکانی وردبینی زۆر بەدیاریکراوی ئەو شوێنانەیان دەستنیشانکردووە. لەبەرئەوە هەرکەسێک بیەوێ لەو ڕێوشوێنە لابدات ڕاستەوخۆ دیاریدەکرێت، چونکە ئەو کەسانەی پێداچوونەوە دەکەن بۆ ئێمە، کەسانی شارەزان لەو ناوچەیە، لەبەرئەوە درۆکردن، بەشێوەیەکی ئۆتۆماتیکی و ڕاستەوخۆ دەبێتە هۆکاری ڕەتکردنەوە داواکاریی وڵاتینامە.

رووداو: من چەند ڕۆژێکە لە دۆمینیکام، زۆر کەس دەبینم باسی ئەو پڕۆگرامە دەکەن. پڕۆژەی نیشتەجێبوون و ناوەندی تەندروستی و فڕۆکەخانە لێرە هەن. ئایا پڕۆگرامی CBI بە چ شێوەیەک سوودی بۆ دۆمینیکا هەیە؟

ئیمانوێل نانتن: پڕۆگرامی CBI نزیکەی 30 ساڵە بەردەوامە. لە ئاداری ساڵی 1993ەوە دەستمانکردووە بەم پڕۆگرامە. ئێمە یەکێکین لە کۆنترین و درێژخایەنترین پڕۆگرامەکان لە جیهاندا. بەشێوەیەکی گشتی زۆر سوودمان لە پڕۆگرامەکە وەرگرتووە. لە دوای باهۆزی ساڵی 2017، سەرۆکوەزیران بەڵێنی دا دۆمینیکا بکاتە وڵاتی یەکەم لە ڕووبەڕووبوونەوەی گۆڕانی کەشوهەوا، بەشی زۆری ئەوەش لە ڕێگەی پڕۆگرامی CBI بووە. لەدوای باهۆزەکە توانیمان خانووەکان دروستبکەینەوە و شۆڕشێک لە بواری نیشتەجێبوون ئەنجامبدەین. نزیکەی 5 هەزار یەکەی نیشتەجێبوونمان دروستکردووە کە توانای ڕووبەڕووبوونەوەی ڕووداوەکانی کەشوهەوایان هەیە. ئەو یەکانە سوودی بۆ هەموو کەس هەبووە لە هەموو ناوچەکانی دۆمینیکا. پرسی کۆڤید و تەندروستی یەکێکی دیکەیە لە پرسەکان بۆ دۆمینیکا و هەموو جیهانیش، توانیومانە 13 سەنتەری تەندروستیی نوێ بکەینەوە و خەریکی دروستکردنی چەند سەنتەرێکی دیکەشین، هەروەها نەخۆشخانەیەکی نوێش کە زۆر لێرەوە دوور نییە لە ماوەیەکی نزیکدا دەکەینەوە کە هەر لە ڕێگەی ئەو پڕۆگرامەوە دروستکراوە. هەر لە ڕێگەی پڕۆگرامی CBI توانیومانە قوتابخانە و ڕێگەوبان و پرد دروستبکەین. ئێستا خەریکین حەوت ئوتێلی پێنج ئەستێرە دروست دەکەین، پێموایە لە هیچ شوێنێکی دیکەی هاوشێوە لە ژمارەی دانیشتووان و ڕووبەر پڕۆژەی لەو شێوەیە نابینی کە هەمووی بەهاوکاریی پڕۆگرامی CBI دەکرێت. پڕۆگرامەکە هاوکاریمان دەکات بۆ ئەوەی ئابوورییەکەمان هەمەڕەنگ بێت و وەبەرهێنانی بیانی بەشێوەیەکی ڕاستەوخۆ بێنین بۆ نێو بواری گەشتوگوزار. بەهۆی ئەو پێشڤەچوونەی لە کەرتی خانووبەرە هەیە توانیومانە کۆمپانیای بیانی بێنین بۆ ئەوەی لە دۆمینیکا کار بکەن، بەوهۆیەوە ناچاربووین کرێکار لە شوێنی دیکەوە بێنین بۆ ئەوەی لێرە کار بکەن. لە بواری پەروەردەدا، هەروەک سەرۆکوەزیران بەڵێنیداوە دەبێ لە هەموو ماڵێکدا کەسێکی دەرچووی زانکۆ هەبێت، بەشی زۆری ئەوەش بەهۆی پڕۆگرامی CBI دەبێت. هەر بەهۆی ئەو پڕۆگرامەوە ژمارەیەکی زۆر خەڵکمان دەچنە زانکۆکانی جیهان. بۆیە بەڕاستی پڕۆگرامەکە بۆ ئێمە دیارییەکی خوداییە و سوودەکەی دەگاتە هەموو کەسێک لە دۆمینیکا. ئەو هەموو شوێنە جوانە لێرە دەبینی، فڕۆکەخانە دەبینی. ئەو خەڵکانەی ئەو شوێنانە بەڕێوەدەبەن لەنێو پڕۆگرامی کارکردنی نیشتمانیدان کە هەلی کار بۆ گەنجەکان دەڕەخسێنێت بۆ ئەوەی ئەزموون پەیدا بکەن، نەک تەنیا لە کەرتی گەشتیاری بەڵکو لە بواری پەروەردە و بانک و دامودەزگای دەوڵەت و کۆمپانیای بیمە. پارەی هەموو ئەوانە لە پڕۆگرامی CBI دابین دەکرێت. کۆمەڵێک لەو کارانە دەکەین و قازانجەکەش بۆ هەمووانە. پڕۆگرامێکی تایبەتمان بۆ کەسانی بە تەمەن هەیە کە پارە دەدەینە خەڵک بۆ ئەوەی ئاگایان لە بە تەمەنەکان بێت لەسەر دوورگەکە بۆ ئەوەی بەتەنیا نەبن و ماڵیان خاوێن بێت و جلەکانین پاک و خاوێن بێت و خواردنی ڕۆژانەیان هەبێت. بۆیە CBI دەگاتە گەنجەکان و بەتەمەنەکان و ئەوانەی دەچنە قوتابخانە و ئەوانەی پێداویستیی تەندروستییان هەیە. پڕۆگرامەکە کاری گەورەی بۆ ئێمە کردووە و گەیشتووەتە هەموو بەشێکی ئابووریی دۆمینیکا.

رووداو: دەگوترێت گوایە بۆ نموونە کەسێک وەبەرهێنانی کردووە و خانوویەکی کڕیوە، بەڵام ئەو خانووە فرۆشراوە بە کەسێکی دیکە و دواتر بە کەسێکی دیکەش. واتە بەشێوەیەک خراپ بەکارهێنانی ئەو وەبەرهێنانە لێرە لە دۆمینیکا کراوە؟

ئیمانوێل نانتن: ئەوە یەکەمجارە گوێم لەوە دەبێت، پڕۆگرامەکە ڕێگە بەوە نادات. بۆ ئەوەی ببیتە هاووڵاتی بە دوو ڕێگە دەبێت، ڕاستەوخۆ لە ڕێگەی حکومەتەوە لەنێو پڕۆگرامی وەبەرهێنانی ڕاستەوخۆی بیانی، یاخود لە ڕێگەی کەرتی خانووبەرەوە، بۆ نموونە دەتوانی وەبەرهێنان لە یەکێک لە ئوتێلەکاندا بکەی وەکو ماریۆت، کێمپێنسکی و هیڵتن و ببیتە هاووڵاتیی دۆمینیکا. دەبێ تۆ خاوەنی ئەو پشکانە بیت لانیکەم بۆ ماوەی 3 ساڵ یاخود 5 ساڵ ئینجا دەتوانی بیانفرۆشیتەوە. ئەوەی کە تۆ باسی دەکەی بەهیچ شێوەیەک لە پڕۆگرامەکەدا ڕێگەی پێنادرێت.

رووداو: با ئەمە بۆ بینەرانمان ڕوون بکەینەوە؛ ئەگەر بۆ نموونە لە 200 هەزار یاخود 250 هەزار دۆلار کە دەکاتە 100 هەزار دۆلاری ئەمریکی وەبەرهێنان بکەی لە ئوتێلێکدا، دوای 3 تاوەکو 5 ساڵ دەتوانی ئەو پشکە بفرۆشی و پارەکە وەربگریتەوە و هەر بە هاووڵاتیش دەمێنیتەوە؟

ئیمانوێل نانتن: بەڵێ. بەپێی پڕۆگرامەکە ئەگەر وەبەرهێنان لە کەرتی خانووبەرە بکەی، ئەو شوێنانەی کە ڕەزامەندییان لەسەردراوە، دەتوانی پشکەکە دوای 3 ساڵ بفرۆشیت، بەڵام ئەگەر دوای 5 ساڵ بیفرۆشیت، ئەو کەسەی کە لێتدەکڕێت دەتوانێ ببێتە هاووڵاتیی دۆمینیکا، بەڵام لە دوای 3 ساڵ کڕیارەکە ناتوانێ ببێتە هاووڵاتی. ئەو پشکانە لەنێو کەرتی تایبەتدا دەبن بۆ نموونە لە ئوتێل یاخود فڕۆکەخانە، بۆیە دەتوانی پشکەکە بفرۆشی، بەڵام تەنیا لەدوای 3 ساڵ، لەدوای 5 ساڵ ئەو کەسەی لێتدەکڕێت دەتوانێ ببێتە هاووڵاتی.

رووداو: بۆ ئەوەی بتوانی لەو پڕۆگرامە بەشداری بکەی، ئەو داواکارییانە چین کە دەبێ جێبەجێیان بکەی؟ هەروەها خەڵکی هەرێمی کوردستانی عێراق کەی دەتوانن جارێکی دیکە فۆرمی داواکاری پێشکەش بکەن؟

ئیمانوێل نانتن: دەبێ ئەو کەسە 18 ساڵ بێت، خاوەنی داهاتێکی زۆر بێت، داوای بەڵگەنامەی بانک بۆ ماوەی دوو ساڵ دەکەین بۆ هەڵسەنگاندنی دۆخی داهات و دارایی کەسەکە، پرۆسەی وردبینی بۆ کەسەکە دەکەین، هەروەها سەیری ڕاپۆرتی تەندروستی و سیڤی کەسەکە و شوێنی کارکردن و قوتابخانە دەکەین. ئێمە خەڵکمان لەوێ هەیە کە زانیاریمان پێدەدەن، وێنەی ماڵ و شوێنی کارکردنمان بۆ دەنێرن و چاوپێکەوتن لەگەڵ ئەوانە دەکەن کە لەگەڵ کەسەکە چوونەتە قوتابخانە، هەروەها چاوپێکەوتن لەگەڵ هاوکارەکانی کەسەکە، دەبێ دڵنیابین لەوەی ئاڵوگۆڕی ناڕوون و نادیار لە بانکەکەیدا نەکراوە و زانیارییەکانمان لە ڕێگەی یەکە هەواڵگرییەکانمان لە جیهان پشتڕاست دەکەینەوە. دوای ئەوەی هەموو ئەوانە تەواو دەردەچن، ئیدی ڕەزامەندی لەسەر دەدرێت و دەبێتە هاووڵاتی.

رووداو: وەڵامی ئەو پرسیارەت نەدامەوە، پێشبینی چەند دەکەی بۆ ئەو ڕاگرتنە؛ شەش مانگ، ساڵێک یاخود دوو ساڵ؟

ئیمانوێل نانتن: پێموایە لە سەرەتاوە وەڵامی ئەوەم دایەوە، ئێمە چاوەڕێ دەکەین وەڵامێکمان لە کۆمپانیاکانی
وردبینییەوە بەدەست بگات، ناتوانم کاتێکی دیاریکراو بڵێم، بەڵام هیوادارم زۆر درێژە نەخایێنێت.

رووداو: زۆر سوپاس

ئیمانوێل نانتن: زۆر سوپاس، بۆ ئێوە کە هاتوون بۆ ئێرە. هیوای خۆشی بۆ ئێوە و خەڵکی عێراق دەخوازین. تکایە لێمان زویر مەبن، ئێمە تەنیا دەمانەوێ دڵنیابین لەوەی کە پڕۆگرامەکەمان بۆ ئەو کەسانەیە کە بۆیان دانراوە. سوپاس بۆ هاتنتان، هیوادارم کاتێکی خۆش لەسەر دوورگەکە بەسەرببەن، کاتێکی خۆش لەگەڵ سەوزایی و ڕووبارەکان و گوڵەکان و هەموو جوانییەکانی دۆمینیکا بەسەرببەن. [1]