ئیسماعیل سلێمان هاجانی

شەنگە ئال
قۆبلە و شەمال
چلمیران،چەمێ کەرسێ و گەلیێ قنێ
فند و شەمال
تم و تم هەسپێ ڕەشی،
ل سەر مالکێن شترنجێ
گەه دیلی و گەه بەردێلی
ئیڕۆ دیسان،
دهەرفن قۆبە و هلێلی
قیز دبن بووک،
بێ خوهننێن ئاخرەتێ
بێ شەڤ حەنا
بێ گۆڤەند و تلیلی
شنگال … شەنگە ئال
دایک و زاڕۆک
پەزکی جەلەب ئاژۆتن
چ فەرمانە.. نە سەفەربەلگە و نە ئەنفال
تێژکەوک هەلەپە بوونە بەدەنا چیا
پر کرن گەلی و نەوال
خودانێن شوورێن دەڤلو و بێدەرێن سەران
ب ئالا ڕەش و مارشا اللە و ئەکبەران
ل بازارا بەنیان
ڕووت و تازی د فڕۆشن دلبەران
شنگال … شەنگە ئال
سەرژێکرن پیر و کال
ئاخینک دبن عەور
ڕۆندک سۆلاڤ و شەلال
کەڤر بتەقن کانیا سپی ئاڤا زەلال
زاڕۆک بەعجین ل بەدەنا چیا
تێهنینە دایکێن ل سەر ڕۆژ و مەهان
شنگالێ.. وا شەنگە ئالێ
کا مرید و کا فەقیر
کا شێخ و کا پیر
کا شێخ مەند و پیر ڕەشێ حەیران
کا پسێ جەم و داودێ بن دەرمان
کا مەمێ شڤان و کا کەرە جال
دیسان هۆلە.. هۆلە .. ل مەیدانێ
ب هەڤڕا بانگ بکن
وەرن قایم بکن ئیمانێ
شەرفەدین تم و .. تم،
میرە ل سەرێ ئەیوانێ.[1]