دیدار، سالار دۆسکی
خانم فەوزیا حەمدی حەسەن سگێری خویشکا هەر دوو شەهیدان( عەبدوالرحمان و عصمەت سگێری) ژ دایک بوویا سالا 1960ێ یە ل گوندێ سگێرێ، دایکا چار کور و کچەکێ یە، ل سالا 1978 کەفتیە زیندانَن ڕژێما بەعس و پشتی ژیانەکا پری ئەشکەنجەدان و نەخوشی ل سالا 1979 هاتیە ئازادکرن، خانم فەوزیا کرێدارە و گەلەک نەخوشی بۆ دروست بووینە، بتنێ خواستا وێ ئەوە مللەتێ کورد بگەهیتە هەمی ئارمانجێن خوە و ب سەرکەڤیت.
خانم فەوزیا سگێری، بۆ ڕۆژناما ئەڤرۆ بەحسێ چیرۆکا خوە ل زیندانێ دکەت و گۆت: پشتی سالا 1975ێ برایێ من شەهید (عەبدوالرحمان) چوو ئیرانێ و ڤەگەریا کوردستانێ وی دەمی مالا مە ل گوندێ سگێرێ بوو، برایێ من خواست بچیتە بەغدا ب بهانا کارکرنێ و بەلکو بچیت بەردەوامیێ بدەتە خەبات و ڕێبازا کوردینیێ د جەرگێ دوژمنی دا و پشتی ماوەکی ل مالا خالەتا من ژیایی و کارکر و هەتا ئاستەکێ باش فێری زمانێ عەرەبی بوو، زڤری مال و ژ بابێ من خواست مالا مە هەمی بچیتە بەغدا ، برایێ من عصمەت ل گەل خێزانا خوە و ل گەل من ب هەڤرا ل گەل شەهید عەبدوالرحمان چووینە بەغدا وی دەمی برایێ من دو زارۆک هەبوون کچەک و کورەک ، کچا وی یا بچیک بوو و هندەک پەز مە هەبوو مە فرۆت و ب وی پارەی چووین و مە ژوورەک ل خانیەکی دا بکرێ گرت ئەم چار مال وی خانی ڤە بووین، ژ بەر نە شارەزایا مە کچا برایێ من یا زارۆک ب ڕێکێ ڤە گیانێ خوە ژ دەست دا و پشتی ماوەکی برایێ منێ خودان خێزان ڤەگەریا گوندی ڤە و ئەز و برایێ خوە بتنێ ماین و ئێدی وی بوومن بەحسێ کوردینیێ دکر و گۆت: مللەتێ مە یێ بن دەستە و دڤێت ئەم خەباتێ بکەین وی دەمی گەلەک باوەری ب من دهات.
فەوزی یا سگێری زێدەتر گۆت: بەردەوام برایێ من چوو گەراج شیمال ل بەغدا و هەکە کورد دیتبانە دئینانا مالا مە و گەلەک قەدرێ وان دگریت.
زیندانی یا سیاسی ئه و ژی گۆت: برایێ من بەردەوام پەیوەندی ل گەل (قیادا موقت) هەبوون، جارەکێ TNT ئینانە مالا خیشکا من ل ئامێدیێ و پشتا من ڤە گرێدان و من گەهاندنە بەغدا و من نەزانی هەر چیە، جارەکا دی دیسا هەر TNT ئینا و برایێ من گۆت ئەڤجارە گەلەک بزحمەترە و دڤێت دەرباز بکەین و ب لافافا پان شیام هەمیێ ب هەلگرم و جارا ئێکێ من نەزانی چیە، بەلێ بۆ ڤێ جارێ نیشامن دا و هەر دەم شیرەت ل من دکرن کو هەر کەسەکێ پرسیارا من بکەت چ ڕاستیێ بۆ نەبێژم و چەند جاران زەلام دهاتن و پرسیارا وی دکر و جیرانا دگۆت ئەڤە بۆ پرسیارا وی دکەن من دگۆتێ خوارنگەهەک ڤەکریە و خەلک پرسیارا وی ژ من دکەت، ل بەغدا مە دو جاران مالا خوە ڤەگوهاست و ل گەل ڤەگوهاستنا ئەڤان کەل و پەلان بەلاڤوک ژ ی ل گەل هەبوون و من هاریکاریا برایێ خوە دکر بۆ ڤەگوهاستنە بەغدا.
فەوزیا سگێری ئه و ژی گۆت: وی دەمی جلکێن سورانی من دکرنێ و هەردەم برایێ من شیرەت ل من دکرن کو جلگێن سورانی بکەمێ و ب ستارەتربوون، ئه و کەل و پەلێن من ڤەدگوهاستن ئەوی بەلافدکرن و دگۆت ئەم کوردین و ناترسین ڕۆژەکێ خودێ داینە و دێ ڕۆژەکێ مرین و ئه و بەلاڤووک ل بەغدا هەلاویستن و گەلەک جاران ژی دچوو سەردانێن زیندانیان و ئه و بەلاڤووک و نامە دگەهاندن.
ناڤبری گوت: برایێ من شەهید (عەبدوالرحامن) گۆت دێ بخوە ماتورەکی کرم و هەکە ئاشکرابووم دێ شێم خوە قورتال کەم و هەکە تۆ گرتی دانپیدانێ نەکەی و هەر مرنە و هەکە نەشیام خوە قورتال بکەم دێ خوە کوژم و دەمێ مالا مە چوویە تاخێ (حی عامر) (3) کریارێن وی من ئاگەه ژێ هەبوو وی گۆت بوونە من و ی پتر پەقاند بوون و هەردەم دگۆت هەمی بزاڤا دێ کەم ل بەر (صدام و احمد حسن بکر) ڤەدەم و نەهێلم.
هێشتا گۆت: هەردەم دەمێ مێهڤان بوومە دهاتن وی دگۆت ل ژوور نەمیننە و دەرکەڤە و هەکە تشتەکی بینی ژی ل بەردەرگەهی گازی من بکە و نەهیە ژوور و ئه و کەسێن هاریکار ل گەل وی دکریاران دا من نەزانین کینە بتنێ وی دزانین، چوونا من بۆ بەغدا ل گەل وی بتنێ بۆ هاریکاریا کریارێن وی بوو هەکە من چ مال و تشت نەزانین وی دەمی گەلەک یا بچیک بووم، برایێ من پەیوەندی ڕاستەوخۆ ل گەل (جەهوەر نامق، فەلەکدین کاکەی، زەعیم عەلی، فوئاد میرانی) هەبوون و دەمێ ژ بەغدا ڤەدگریاینە گوندی برایێ من بەردەوام پەیوەندی ل گەل ئەڤان کەسایەتی یا هەبوو و چوو ناف بەراوری یا ل گەل پێشمەرگەی و تشت دگەهاندنێ و هەمان دەم تشت ژ دەف وانژی وەردگرت و مە ل ەل خوە دبرە بەغدا…
هەمان زیندانی یا سیاسی بەحسێ ڕۆژا گرتنا خوە کر و گۆت: ڕۆژەکێ برایێ من خواست ل گەل جیرانێن مە ئەوێن ل گەل مە دخانی دا دژین بچینە بازاری و دەمێ چوویم ڤەگەریام هێشتا نێزیکی مال نەبوویم ل نێزیک (باغچێن زەورا) هێزێن ئەمنی هەمی تاخ گرت بوو و گەلەک قەرەبالغ بوو و دەمێ من ئەڤە دیتی پشتا من ژ کەست و گەلەک یا چاڤ ترسیای بووم وێ جارێ هێزێن ئەمنێ هاتنە پاصێ دا و داخازا ناسناماکر و زانین ئەم خودانێن مالێ نە و ڕێک دامە بچینە مال و بەردەرگەه پرسیار ژ مە کر و ئەوا جیرانێن مە ژن و مێربوون خوە دیارکرن و گۆتە من تو کی من گۆت ئەڤە مالا منە و ئەوا گۆت چ یا عبدوالرحمانی من گۆتێ برایێ منە هەر ئێکسەر چاڤێن من گرێدان و دەستێن من کەلامچەکرن و هاڤێتمە ترۆمبێلێ دا، برایێ من حەسیابوون و برایێ من خوە ڕادەست نەکربوو و هەر ئێکسەر خوە کوشت بوو، پشتی گرتین ئێکسەر برینە ئەمنا عام و جورێن قوتانێ و ئەشکەنجەدانێ و ترس و برسێ من دیتن و هەر کەسەکێ بگەهیتە مالا مە مرۆڤێن مە ل هەر جهەکێ عیراقێ هەبیت هەمی ئەمنێ گرتن و ئەشکەنجەدان و خوە هەکە کەسەکی جارەکێ ژی سەرەدانا مالا مە کربیت هاتە گرتن و هندەک ناڤ ژی ل گەل برایێ من هاتنە دیتن و ئێکسەر دەست ب گرتنا وان هاتەکرن و گەلەک کاغەز ل مالا مە هاتنە دیتن.
فەوزیا سگێری ئه و ژی گۆت: هەر دەمێ دهاتن پێزانین ژ من وەرگرتن دا بێژن عەبدوالرحمان ئەڤ تشتە گۆتینە و چ جاران نە گۆت هاتیە شەهیدکرن یان کوشتن و من ژی چ جارا پێزانین ل سەر برایێ خوە نە دگۆتنێ وپاش برمە (محکمە پورە) ل گەل چار کەسان کو زەلام بوون چوومە دادگەهێ و هەر چاران سزایێ سێدارێ ل سەردانا، ئەم دو ژی سزایێ هەتا هەتایێ ل سەر مە هاتە سەپاندن چونکە ژیێ من 17 سال بوو هەکە دا ئەژی هێمە سێدارەدان ، چونکە من عەرەبی نەزانی من نەزانی کو سزایێ من هەتا هەتایێ یە و هەتا زڤریمە زیندانا ژنان ل بەغدا و پەنجە مورێن من هاتنەوەرگرتن و پشتی بریمە زیندانێ برمە ژوورەکێ ڤە سێ تەخت تێڤە بوون و سێ ژنێن سورا تێڤەبوون و دو ژوان کچەک و دایکەک بوو ئه و ژی سەرا دوزا مللەتێ کورد هاتبوونە زێدانکرن.
زیندانی یا سیاسی فەوزیا حمدی سگێری زێدەتر گۆت: ل یزندانێ بتنێ بەتنیەکا عەسکەری ل بن من بوو و من خوارن نەخوار ڕۆژەکێ برایێ شەهید(عسمەت) ئینا دەرێ زیندانێ وی گازی من کر و ژمن خواست خوارنێ بخوەم و هەر من خوارن نەخوار و من گۆت هەتا (عەبدوالرحمان) نەبینم خوارنێ ناخوەم و چاڤێت من گرێدان و برمە مالا مە ل (حی عامری) و من دیت هەمی هاتیە تێکدان و خوین ب دیوارن ڤە بوو و گۆت ئەڤە خوینا برایێ تەیە و من گۆت هەوە دگۆت یێ ساخە گۆت نەیێ ساخە و هەر وەرگێری دگۆت بلا مەلا مستەفا بهێت چارەکێ بۆ هەوە بینت بۆچی ناهێت و هەر ئێکسەر دل گرتی وبووم ودەمەکی هشیار بووم ل نەخوشخانێ بووم و دووڤ دا برمە نەخوشخانا داد و برمە جهێ جەنازا و برمە سەر جەنازێ برایێ من و گەلەک وەرم بوو و گۆتن ئەڤە یە و من گۆتێ نەخێر پشتی من سحکریە پرچا وی من نیشانا پرچا وی دیت و من زانی ئەوە ئێکسەر کەفتمە ڤە و دل گرتی بووم و هەر ئێکسەر گۆت کا مەلا مستەفا بارزانی بۆ تەوەرا هەوە ناهێت بۆچی هندە دێ خشیم بن.
خانم فەوزیا گۆتژی: پشتی برینە زیندانێ ناڤێ من کربوو (ام قنبلە) وەک تیرۆرستان ل زیندانێ تەماشەی من دهاتەکرن و بتنێ ئەز ل گەل ئەوان ژنێن کوردێن خەلکێ سلێمانیێ و کەرکووکێ بووم و هەر چ کارەکێ بزحمەت هەبا ب مەدکر و گەلەک پاشڤە دبرین و ئاخفتن بەردەوام دگۆتنە مە و خوارنا مە گەلەک یا کێم بوو.
خانم فەوزیا گۆت: جارەکێ بابێ من و زەلامێ مەتا من سەرەدانا زیندانێ کر و هاتنە دەف من و چەند جاران هاتنە دەف مە و پشتی ئەحمەد حەسەن بەکر ژ دەستهەلاتێ هاتیە لادان و سەدام حسێن هاتیە سەر دەست هەلاتێ، لێبورینەکا گشتی دا بۆ هەمی خەلکێ کوردستانێ کو بهێنە ئازادکرن و ئە ژی هاتمە ئازادکرن.
هێشتا گۆت: ژ بەر نەخوشیێن خوە کو پشتا من و پێت من هەمی نەدرستن و هەکە من دڤیا بەردەوامیێ بدەمە خەباتا خوە و ماندیبوونەکا مەزن مە بریە یا سەربلندم و نەیا پەشێمانم .[1]