لەو سەحەر جەولان ددت بایێ سەبایێ ڕاست و چەپ
سۆسن و سونبول ب مەستی بێن سەمایێ ڕاست و چەپ
دا ژ محرابا دو نوونان سەجدە بت ئەسوەد-حەجەر
دل ب میزان ماهێ نەو ئەبروو نومایێ ڕاست و چەپ
دل ژ بسکا فلفلین بوو فر ددا خالا سیاه
شەهپەرێ زولفا شەپالێ دالێ دایێ ڕاست و چەپ
عالەمەک وێرانێ زولفێن تە ژ ڕەنگێ عەنبەرێ
چەرخ و پەروازێ ددن جارەک ل بایێ ڕاست و چەپ
خەنجەر و تیر و تەبەر بارین شوبه بەرق و برووسک
مسریان لامع ژ ئەلماسان ددایێ ڕاست و چەپ
تەیرک و عقد و شەراب و نەترک و بەرگ و وەرەق
هەر ب لەرز و جەزبەیێن یاقووتێ تایێ ڕاست و چەپ
بشکۆیێن بەندا گریبانێ ژ ڕەنگێ کەوکەبان
بەرق و تیر و ژین ژ خورشیدێ ڤەدایێ ڕاست و چەپ
کەوکەب و قەوسێ قەزەح لووئلووئێ بەندا حەیدەری
تێن تەوافا زولف و خالێن دلروبایێ ڕاست و چەپ
دل دخوینت زولف و خالان دێم و بالایێن ژ نوور
هەر ب قانوون موژدەیا غەیبێ ژ نایێ ڕاست و چەپ
زەنگییان جەوشەن ڤەبەستن پێشبەرێ جۆقا حەبەش
دابەرستن یەک ب یەک چوون بەر لوایێ ڕاست و چەپ
چنگاچنگا بشکۆوان ئاواز و دەنگێ زەرگۆوان
سەد مەلایک گوه ددن بەر وێ نەوایێ ڕاست و چەپ
لەو ژ عشقا وێ دنالن بازن و بەرگ و وەرەق
جەزبەیا دل من ژ ڕەمزا وان گهایێ ڕاست و چەپ
زوهرە و عقدا سورەییایێ د شەرقێ کەششفین
لەیلەتو ل-قەدرێ ژ مەغرب پەردە دایێ ڕاست و چەپ
زوهرەرەنگێ ماه و خورشیدێ ژ بالا وێ نوما
لەو دو کەوکەب چوونە ڤێ ڕا ئستوایێ ڕاست و چەپ
بێتە ئەیوانێ ژ خەلوێ حۆرییا قودسی-سرشت
سەد هەزاران حۆری قودسی تێن لقایێ ڕاست و چەپ
ما مەلایی ئەز لەبێ لەعل ئابێ حەیوان بت نەسیب
قودسییان ڕاگرتین دەستێ دوعایێ ڕاست و چەپ
من د دل کۆڤان هەزارن داغ و کەیبەر بێحساب
نێرگزێن شەنگ د مەستن چەپ و ڕاست
#مەلای جزیری# [1]