داستانو حەیدەری و سنۊبەرۍ
بەشۍ یەرەمە
نویسەرو داستانەکۍ وەڵۍ ئانەی بلۊنە دلۍ باسو عەشق و ئازایی (حەیدەر و سنۊبەر)ۍ، داوا جە زاتو هەقی مەکەرۊن بەخشۊش جە گوناحەکاش، پېسە بەڼێوە تاوانکاری وەردەمو قاپی زاتو هەقینە سواڵەو بەخشای و بەزەییش چەنە مەکەرۊن.
چڼێ کافران، لېشان ویەردی
چەن خراو نە چەم، خاسان ئاوەردی
پەی چېش کە مەعبوود، کەرەم جۊشەنی
سەتتارلعیووب، هەم سڕ پۊشەنی
ڕازی دەروونم، وەنەت عەیانەن
چە حاجەت وە نوتق، واتەو بەیانەن
بەڵام، ئیستیدعای بەندەی کەمینە
هەر ئېڎەن، جە لات، ئەی بۍ قەرینە
گونای ویەردەی، ئی بەندەی کەمتەر
ببەخشە، بە زات، پاکی پېغەممەر
عەفوبان، گونای بەندەی شەرمەزار
عەفوون، هەر کات، کەرەم بۍ شمار
فعلی شەیتانیم، جە زبان دوور بۊ
تا، حاڵ نەزانام، بیناییم، کۊر بۊ
تا کەی خجڵ بوون، جێی شەرمەساری
وەسېن، وەس دەرپېم، ئەی کەچ ڕەفتاریی
ئەگەر جە گوفتار قال و بەلا هەن
بە یەکتایی وېت، وەنەت گەواهەن
ئەر (بەلا)م واتەن، یا واتم (نەعەم)
هەر تەقدیری تۊن، تۊ دانی پەنەم
وەی عەقڵی نوقسان، ئەوەندەم زانا
بەڵام، هەر کەلام، شەریفت وانا
هەرچی ڕەزاتەن، جە کۍ مەپەرسیی
هەرچی مەکەریی، جە کۍ مەتەرسیی
کېن سیوای وېت، کانی سەخا، بۊ
ڕجا کەردەی وېش، کانی ڕجا بۊ
هەر تۊنی مەعبوود، ئەزەڵ تا ئەبەد
هەر تۊ مەشناسوون، وە کېمەن مەدەد
تەسلیم وە ئەمری، هەرچی قەرارەن
کەرەم دارەنی، کەسێ چە کارەن
بیاوە بە داڎ، بەندەی شەرمەسار
کەرەمدار تۊنی، حەیی، جەهاندار
کەوکەب جە دەرگات، ئەرجووش ڕەوانەن
سەتتاری سڕپۊش، وەنەت ئایانەن
ئەوەڵ ببەخشە، گونای ویەردەم
گونای بېشومار، کەس حەیی نەکەردەم
ئەی شەرمەساریی، وەنەم وەسېن وەس
مەکەرەم شەمەسار، بەندەت نەدەی کەس
ئەگەر مەواچوو، وەنەم گەواهەن
وە گەر ببەخشیم، بە تۊم ڕجا هەن
وەلحاسڵ، هەرچی ڕەزای تۊ پېشەن
بەندە فەرمانم، سەڵای تۊ چېشەن
دووەم ئیستیدعای بەندەی شەرمەسار
ئېدەن نە دەرگات، کەرەم بېشومار
ما باقی حەیات، تا واڎەی تەسلیم
دوور بۊ، جە ئەوقات، شەیتانی ڕەجیم
دڵم وە مەعدەن ئەسراری تۊ بۊ
زمانم بە زیکر، گوفتاری تۊ بۊ
قەترەی جە ڕەحمەت وردی گرانبار
وزی نە دەروون بەندەی بۍ مقدار.[1]