داستانو حەیدەری و سنۊبەرۍ
بەشۍ دواڼرەهەمە
وەختێ (سەمەنبەر) گېڵاوە، هەواڵەکەش بە (سنۊبەرۍ) یاونا، ئاڎییچە ئایېرش گېرت، چونکوم هەسش بە کەمیی کەرد، کە کابرێوە مېمان، دمای ئاگرد خزمەتەیە، شانش دان شانو سنۊبەرېوە و داواو عەشقی و هامسەرگیرییش چەنە کەرۊن.
سەمەنبەر بواچوون باز تاوەدار
عەرزکەرد بە خزمەت، ماهی جەهاندار
سنۊبەر ئەژنی، شی نە جامەی قین
وات: بە هومەیلا، ڕەخشم بکەر زین
خېزا نە جای وېش، وە بۍ مدارا
پەی قەتڵی ئەولاد، دارای بن دارا
پۊشا، وە باڵاش، بەرگی خەزای جەنگ
زینەت، دا بە وېش، چوون سوپای فەرەنگ
زوڵف کەرد بە سېیاخ پەرێ شۊڕ و شەڕ
کەمەر بەست، بە زات، پەی قەتڵی حەیدەر
وات: بە شاخ نەیات: چادر بکەر بار
مدارا مەکەر، باوەرە قەتار
تا من بزانوو، چەنی ئی جوان
کېن و چە کارەن، من کەرۊ مېهمان
کېن پەی من مەبۊ، وە یاگە فەرهاد
من کەرۊ ڕەفېق، شیرینی ناشاد
ئەراگېڵێ هەن شاهانی ئەقلیم
کەی من، وە مېهمان، هەرزەکاران بیم
دیارەن جوان هەرزەکارێوەن
مەغروور و مەدهۊش کەچ ڕەفتارێوەن
وەرنە چ نیسبەت گەڎا، بە گەوهەر
پەی چی بەرۊ نام، باڵای سنۊبەر
سوار بی مدرا، وېنەی سەوڵی تەڕ
بارکریا، قەتار، تەمام داش نە وەر.
[1]