داستانو حەیدەری و سنۊبەرۍ
بەشۍ شاڼزەهەمە
کار جە کاری ترازیا، حەیدەر خەڵتانو ۋنۍ کریا، سنۊبەرە وەختێ بە وردی سەرنجەو حەیدەریش دا، دیش گەنجێ ڕوومەت جوان، نازدار، عومرش بە ویس ساڵی نەیاوان، ئیتر هەناسۍ سەردېش هۊرکېشتۍ و پەی کەردەی وېش پەشیمانیش بەرد.
عاشق وە ڕۊخسار، خاڵی ئاڵاش بیی
ماتڵ وە دیڎەی بەژن و باڵاش بیی
زۊر ئاوەرد بە ئەسپ، تا وەلای یاران
مەڕېزاش نە چەم، ئەسرین چوون واران
وات، بە کەنیزان، خاڵ تەختەی بېگەرد
دیت کە دونیای دوون، چېشش بە من کەرد
مەردی مېهمانم، پېکا وە شمشېر
کەفتەن، نە زەمین، وېنەی نەڕەشېر
پەشیمانەنان، من جە کەردەی وېم
پەشیمانی سوود، نەدارۊ پەرېم
چە خاک وە سەرکەم، وە کام دەرد ناڵم
وېم بە کەردەی وېم، هەرەس وە ماڵم
یاران، دڵسۊزان، کەنیزانی من
بەیدۍ بکەردۍ، سەنگڕېزانی من
مەردی مېهمانم پېکا وە شمشېر
کەفتەن، نە ڕوویێ وېنەی نەڕەشېر
حەیفم هەر ئېدەن، تازە جوانەن
گۊناش مەواچی، ماهی تابانەن
هاوارم ئېدەن، نەیاوان بە کام
کەردم وە لوقمەی شمشېری بەڕام
داخدارم پەرێ خەتی ڕېحانش
شېونام بە زەرب، ڕیشەی ڕېحانش
هەراسم کەردەن، زوڵفی ئەفشانش
بېجام کەرد، کەردم بە هوون غەڵتانش
مەتەرسوو بمرۊ، حەیفەن جوانەن
وە سەرگەردش بام، شېری ژیانەن
هەر ئەو مەڵاڵا، دەستش نمەشەند
ئەگەر مەشەندش، حەیاتش مەسەند
من نامەردیم کەرد، چە خاک وە سەر کەم
مەبۊ جەی دنیا، قەتعە نەرەرکەم
فەلەک ڕووڕەشی بە شانم ئاوەرد
تاکە بکېشوون، هەناسانی سەرد.
[1]