قەباڵەکۍ هۆرامانی
بەشۍ یەرەمە

جۊر و زوانو قەباڵۍ یەرەمۍ و جۊرو ڕانویسەکەیش، کە بە ئەلف بای ئارامی نویسیان، ڕاسی ئا واتۍ وەڵېما پەی سەلەمنۊ، دیسان یاومۍ ئا بڕوێ کە بېتەرسو لەرز واچمۍ کە زوانەکە زوانو سەرجەمو ئا ناوچەو هۆرامانیە بیەن، چونکم ئەسای و ورەتەی چامنەی کەم بەها، نە وەردەمو دەزگا میریەکانە، نە بە زوانی میریچ منویسیۊ. نەبیەی نامۍ پاشاو ئا سەردەمەیە دلۍ قەباڵۍ یەرەمېنە، ئا ڕاما پەی سەلەمنۊ، دیسان سەرشېیەی باو و برەویما پیشانە مڎۊ، ئینە گەر ڕۊخسار و میرزا بنویسی(کاتب) وەچەم نەگېرمۍ.
میرزای بنویس(کاتب) دیسان جە لەیەکدایۆ ناواخنو قەباڵەکانە یاگۍ سەرنجیەن، پەی نمونەی ڕەنگە میرزا بنویسەکە ئاستو زانیاریش فرە کەم بۊن، یان یەک زوان بزانۊ و تەنیا پا زوانیە بنویسۊ و بزانۊ، ڕەنگەیچ میرزێوە بە تەوانا نەبۊن. بە هەرحاڵ ئی چن خاڵەو خاڵۍ تەرېچ، پەی وشکنەری فرە سوڎمەڼېنۍ و بە وردبیەیۆ هەر خاڵێ چا خاڵا وشکنەر مەتاۊو یاوانە و هەم باوەڕو وېش بە ڕاسی و ڕەوانی بەیان کەرۊن.
ئانەی یاگۍ واتەیەن، یۊشېیەیێ دلۍ زوانو ئی قەباڵۍ و ئانۍ مانی( هەرچن چن سەدێ ئینا میانشانە) کە جە (تۆرفان) ئېزیانۆ و ئا زوانو دلۍ(شاپورگان)ی، فرە بە(تینا) بە جۊرێ کە یەک زوانی مشان، کە زوانو وەرنیشتو ئێرانېیەن کە کوردستانو ئارۊین.
پەی لەیەکۆدایۆ ناواخنو دلۍ قەباڵەکا هۆرامانی بە دیاریکریایی جە ڕوەو زوانیۆ، مەشۊم وشکنەر هاگاڎار و ئانەی بۊن کە تا دەمو ئامای ئەشکانیەکا دینو ئاڤېستایی بە کتېب و بە دەمواچیچ قەڎەغە کریابۍ، ماوەو قەڎەغەکەیچ چن سەڎێوەش خواینان، دیسان مەشۊم ئانەی زانمۍ کە سەروکڵاو و (بلاشی یەکەم)ەنە کە بە ئەشک-و ویسو ئەشناسیابۍ، پەی یەکەم جاری فەرمانو جەمکەردەیۆ و نویستەیۆ ئاڤېستایش دان، ئینجا چڼش مەنەبۍ و چڼش نویسیانۆ بەتەمامی ڕۊشن نېیەن، بەڵام نویستەکە هەرچن بیەبۊ بېگۊمان بە ڕانویسی ئارامی نویسیانۆ، چونکم هەڕەتو نویستەی ئارامی بیەن.[1]