ئاژەڵداریی جە هۆرامان
ئەوەنویستەی و دەسکاریکەرڎەی: ئەسعەد ڕەشید
بەشۍ یەکەمە
خانەوادۍ هۆرامیۍ، چەنی بەبۍ باخ و باخداری نمەژیوان، هەرگیز نمەتاوا بە بۍ ئاژەڵ و حەیوانداریچ بژیوان. بەشێ فرەو خانەوادەکا مەیی و بزېشان هەنۍ، کە بەشو پەنەۋازی وېشان کەران، بەرهەمە زیاڎەکەیچ جە شۊت و ماسی، ڕوەنش چەنەگېران پەی پەنەۋازیەکا تەریشان.
ناوچەو هۊرامانی، چوونکم سەختەن گرڎ ئاژەڵێ و باڵدارێش چەنە نمەژیوۊن، بە فرەیی(مەی، بزە، گاوە، هەر، هەسەرە)، جە باڵدار و پەلەوەریچەنە(کەرگە، ژەرەژی) مەژیوان، بە دەرەجەی یەکەمیچ(بزە و هەسەرە).
خەڵکو هۆرامانی، بېجگە بەرهەمو ئاژەڵی(شۊت، ماس، دۊ، پەنیرە، کەرۍ، سیراجی، ڕوەن)، سوود جە وڵاخەکا هۊرگېران پەی بار بەردەی، زیاتەر بار و دارا کە جە کەش و کۊ و دلۍ باخانە گلېرېشان مەکەراوەو بە بارو وڵاخی(هەر، هەسەرە) بەراشاوە پەی دەگێ.
جە هۆرامان، هەر یانێ حەیوانش بۊن، پېویسش بە لەوەڕی زمسانەین،(لۊجاڕە، کەماجاڕە، گزرەجاڕە، شەوەرجاڕە) جە وەهارەنە کرېکارشان پەی گېران و دروونیا و کۊکریاوە و وشکېشان کەران، ئینجا کواشا و وردېشان کەران، بە بارو وڵاخی ماراشاوە پەی یانەی و دلۍ(کاڎان)ینە هۊرشان گېران پەی زمسانی.[1]