ڕاوەشکار جە هۆرامانەنە
ئەوەنویستەی و دەسکاریکەردەی: ئەسعەد ڕەشید
بەشۍ دوەمە

خەڵکو هۆرامانی، وەرزو پایېزی و زمسانینە، چن جۊرۍ ڕاوە کەران، باسو (دەمو جۊر) و چن ڕاوێ کەرمۍ:
ویار:
ویار، ڕاوە ژەرەژەن، بەڵام جە سیپەنە و جە ئاخر و ئۊخرو زمسانی و ئەوەڵو وەهارینە.
چی ڕاوېنە، تفەنگ(وەرەندڵ، ساچمەزەن، تاپڕ) بەکارمێ.
سیپە: بە هەژگە و تەوەنی، یانەقۊڵێوە بە پانی گەزێ وەشکریۊن، بە شېوێ ناڕېکوپېک، یاگۍ وېشارتەیۆ ڕاوچیەن.
واچۍ(ویار)ی، بە ماناو(ڕاویەر)ی مێ، جە وەختو کۊچو(ژەرەژا) جە گەرمیانۆ، پەی کوېستانی، بە لەتە پڕان، نیمەو ڕێنە لامڎاو نیشاوە، شەوێ چا کەشوکۊنە مەناوەو پەی سەوای، دیسان پڕان ڕوەو مەنزڵ. ڕاوچی هاگاڎارەن، سیپەکەنە وېش شارۊوە، وەختێ ژەرەژەکۍ نیشاوە، یان ئا شەوە مەگېڵان پەی واردەی، بە تفەنگ تەقەشان وەنەکەرۊن. سیپە یاگێ خاوەندارەنە، یانی گرڎکەس سیپەو وېش هەن، گەر نیازو وەرتەیش بۊن، ئانە بە سەنەڎ ورەشۊش، یاگە خاسەکۍ، ئا سیپێنۍ کە مەگنا سەرەڕاو گۊزەرو لەتە ژەرەژا وەهاری، هینۍ بەگزاڎەکا، یان شېخەکانۍ، سانەکۍ و بەگەکۍ، سیپەو وېشان هەن، کە جە باوانشاوە پەیشان مەنەنۆ.[1]