داخ وە بان داخ، داخ وە بان داخ
دەرد وە بان دەرد، داخ وە بان داخ
جە داخ دۇری شای بوڵەند دەماخ
من جە گەرمەسېر ئەو شی وە لېڵاخ
جەو پەی داخینم تا مەرگ سامان
یانەی باوانش ئاماوە دامان
ئېم ساڵ نەووەهار وەنەم (دەیجۇر) بۍ
پەی چی؟ کە دیدەم جە دیدەش دۇر بۍ
ئەو شی وە لېڵاخ چۇن بېبەینەتان
من مەندە پەی دەرد سزای مەینەتان
تەرسۇن جە بازی بازاڕی گەردۇن
جە کەج نەردی چەرخ دەوری دنیای دۇن
مەجنۇن هاشت وە داخ سزای دەردەوە
قاپی خەم نە بەخت فەرهاد کەردەوە
یەک یەک هامسەران جە گېیان بېزار کەرد
ڕۊی ڕۊشن جە عەین دەردینان تار کەرد
ئەو ئەردە وە بەخت قەیس و مەجنۇن شەند
بەردی بنچینەش جە بنیاد هۊرکەند
مەتەرسۇن جە بەخت منیچ بشانۊ
سزای ئەو یاران پەنەم بنمانۊ
ئېنەیچ وە قېسمەت (ئېبن سەلام)م بۊ
من وەی دەردەوە دەورەی دنیام بۊ
یا شائی نەردە نېشانیم وە بەخت
ئەر بۊ مەرگم بۊ وەرجە وادە و وەخت
مەرگم خاستەرەن من جەو ژیانە
جەی زندەگی پۇچ شاد پەشیمانە
[1]