چېش جە بارەو هۆرامانیۆ نویسیان
ئەوەنویستەی و دەسکاریکەردەی: ئەسعەد ڕەشید
بەشۍ یەرەمە

بەرهەمو (نور الانوار):
کتېبێ دەسنویسی هۆرامیەن، کە(شېخ عەبدولسەمەد)ی تووداریی نویستەن، (ناوچەو تووداری مەگنۊنە ناوچەو ئارېزی، بەرەو ڕاو سەوڵاوای، کە ناوچێ نزیکەن جە شارو سنەی، مەگنۊ سەرو ڕاو سنە و مەریوانی)، کە فرەو دلینەکېش پەی درەختنامە(شجرە) و خانەوادەکەیشان تەرخان کەردەن، لاڵیایۆ و هاناو هاوارێ دڵتەزن وهەس جووڵەرەن، کە وانەر مەوزۊنە حاڵەتو دڵپەڕی.
شایانو ویرمەنەین، کە ماوەو تومارو ئی بەرهەمەیە زیاتەر جە چوار سەڎ ساڵا چێوەڵین، کەرەسەی زوانیش، پەڕەن بە کەرەسەی زوانی کۊن، زیاتەر چانەیە پەیمان بەرمەگنۊ، کە زوانی هۆرامی پېسە زوانی دینی تا ئا سەردەمەیچ، هەر زوانی باڵادەس بېیەن، هەر چەنی مەولەوی تاوگوزی شېوە جافییەکەو وېش جە نویستەی شېعرېنە، جیائاستەنو دەسش گېرتەن زوانی هۆرامییۆ.
وانەری ئازیز، پەی زیاتەر شارەزایی مەتاودۍ تەماشەو ئی بەرهەمەیە بە زوانی کوردی کە ماموسا محەمەدو مەڵڵا کەریمی وەڵاکەردەنۆ.
وەڵۍ ئانەی چېگە بلمۍ، گەرەکمەن باس جە بابەتێ کەروون، ساڵەو(1995)ی، بەڕېز(ستوودە)، کە وەڵتەر وېش بە کورد ئەشناسابۍ، کە جە نەوەو توودارییەکان، چی دماوە، بە هۊو کۊمەکو وەڵاتو ئېرانی و چن کوردۍ پاسدارۍ دوڵەماڼا، جە شارو سنەی و تووداری کۊنیشتێشان بەستە، چاگە بەیانو ئانەیشان کەرد کە توودارییەکۍ جە بنەچەنە سەیېدېنۍ و هەم فارسېنۍ.[1]