#بېسارانی#
تەشریف ناوەردی، تەشریف ناوەردی
بای شەماڵ چېش بی، تەشریف ناوەردی؟
عەرزو حاڵی من پەی یار نەکەردی
مەر شەربەتی دەست بېشەرتان وەردی؟
یەقین هەرزەگەرد بۍ مەتامەنی
چۇن سارائییان خەیاڵ خامەنی
سەرسامی، سادار، سارا گېڵەنی
چۊڵ گەردی کەم فام، تەمام وېڵەنی
مەر هەر کەس دەلیل دەردەدارانەن
قاسېدی نامەی کەفتە کارانەن
چۇن تۊ بۍ بەینەن ئەحواڵ ناوەرەن
سەودایی سیفەت، خەیاڵ نە سەرەن؟
ئومېد هەن دەرگېڵ سەرزەمینان بای
ئاوارەی وەتەن جام جەمینان بای
تا بە جەستەی من هەنی هەژاران
نەکەری خەریک چەمەڕای یاران
[1]