#وەلی دېوانە#

هەر من خەمبارم، هەر من خەمبارم
هەر من خەمینم، هەر من خەمبارم
هەر من «پەروانە»ی «شەم» نادیارم
هەر من سەرگەردان زوڵماتی تارم
هەر من ستارەم جە نەحسی پەستەن
هەر من ڕای شەش‌ دەر نەردم دەربەستەن
هەر من چۇن مەریخ خارجەن یانەم
هەر من بەدنامیم پەخشەن جە عاڵەم
هەر من کوشتەی نېش عەقرەب ژارەنان
هەر من ڕیسوای دەوری ڕۊزگارەنان
هەر من زیجی نەحس کەفتەن وە بەختم
هەر من سزاکېش ئازاری سەختم
هەر من «دەلو»ئاسا نە قەعر چاهم
هەر من چۇن مەجنۇن چارە سېیاهم
هەر من ئېقباڵم نەردەن نەدارەن
هەر من چۇن فەرهاد کۊکەنیم کارەن
هەر من فریشتەی دەوڵەت خامۊشم
هەر من چۇن بەهرام نمەد وە دۊشم
هەر من جە ڕای دین بېزاریم وەستەن
هەر من چۇن سەنعان زوننارم بەستەن
هەر من جە تانەی ڕەقیبی ناهاڵ
هەر من شادی و زەوق دنیام بی بەتاڵ
هەر من پەروانەی پەشېو حاڵەنان
هەر من شەو تا ڕۊ شەم خەیاڵەنان
هەر من جەو سەبەب ستارەی چەفتم
هەر من شەم ئائین جە شەم دۇر کەفتم
هەر من وەبۍ «شەم» گڕاگڕ گڕیام
زەنگی بەد نامی نە عالەم زڕیام
هەر من گشت پەی شەم خاترم ڕېشەن
(هەی)* یاران عیلاج دەردی من چېشەن

* چە دەسنۋیسەکەنە:
هەر یاران عیلاج دەردی من چېشەن
نۋیسیان، بەڵام چاگەنە دۋەپاتکەرڎەی بېیەیش نېیا، تاکو (ھەر) بێۋ، بەڵکو پەرسای مێۋ: ... چېشەن
ڕەنگا، فاڕیای ئامرازو چڕیەی و سەرنجکېشکەرڎەی (ھەی) بە ئامرازو دۋەپاتکەرڎەی ڕوەشدێبۊ.
[1]