باخچێوە بېگەرد
نویستیەی: میرزا ئۆلقاڎرو پاوەی
بەشۍ سەڎ و هەشتا و ششەمە
ئەبوتالیب، شمشېرش هۊرکېشت، تا سەباحو ساڵحانی چواردۆرو یانەو پېخامئاوەرینە پاسەبانیش مەکەرد، تا یەرێ ساڵۍ ئەپا حاڵە ژیوایشان گوزەرنا.
هەر جە ئان حەج کەعبەی موعەززەم
مامان وە بەیروون یاران گرد وە هەم
سەودا گەرمەنیشت نە ڕاگەی حەجاج
هەر کام جینسی وېش مەکەردش هەراج
فېشتەر جە قوڕەیش حەسەد مەبەردەن
دایېم مەزڵوومان ئازار مەکەردەن
چوون ئەبوتالیب دانای خورەدمەند
دیش ڕاگەی ئیسلام یەکسەر شیی وە بەند
یەکسەر شمشېرش کەرد وە حامیڵ
لاڎێ جە حەزرەت نمەبی غافڵ
شەوگەردی مەکەرد نە دەوری یانەش
وە ڕۊ سەر منیا وە پۍ ئاسانەش
ساتێش نمەکەرد حەزرەت فەرامۊش
دیکی دەروونش جە خەم مەدا جۊش
تا سوبحی سادق نە دەوری مەنزڵ
خزمەتش مەکەرد بە دیڎە و بە دڵ
بە ڕۊ مەواتش ئەولادانی وېش
نەبیرەی فەرزەند دامادانی وېش
نە دەوری حەزرەت پاسەبانی کەن
چوون خواجەی غوڵام، جان ئەفشانی کەن
غەرەز تا سێ ساڵ وەیتەورە وېیەرد
ئەبوتالیب ڕەنج چەنی حەزرەت بەرد
تا ئەوقاتشان گېڵا بە تاڵی
یەکسەر حاڵشان بیی بە بەڎحاڵی
گرد وە عەتش و جووع زۊر ئاوەردەن
بېزاربین جە گېیان ڕازی وە مەردەن
جە دمای سێ ساڵ یارانی یەک دڵ
خەریک بین چەنی ماجەرای موشکڵ.[1]