شەوبەن کەلتوورێ مروڤەکان
شەوبەن یام پەچە و مەقنەع کەلتوورێ مروڤەکا وېشانە، بەرهەموو ژیوای و ژیوگەیشانە. کەلتوورو عورف و عادەتیج گەر ناشیرین نەبۊ، چەنی دینی کېشەش نېیەن.
تۊ واچی ئېمە جە زاناو مەڵڵا ئایینیە وەڵینەکاما خاستەر جە دینی یاوێبیمېنە؟. گەر لاکەرمێ پەی وېیەردەیما جە هۆرامان و کوردەوارینە بە هیچ تەحرێ نە شەوبەند نە پەچەو مەقنەع نمەوینمۍ. ژەنیما بە ئەوپەڕو نەجابەتی و سەنگینیۆ چەنی پیای کارش کەردەن و هەرەوەزیش کەردەن، جلۍ وېمانۍ هەم ئاڎەمیانۍ و هەم شەرعیۍ.
خۊ گەر ژەنێ ڕوومەتش پۊژنابۊرە، نامۊ بیېنە دلۍ خەڵکینە.
مەڵڵا مستەفاو بېسارانی وەختێ وەشەویسەکېش مەوینۊ هەکە شەوبەندش کەردەن و چەمېش پۊژنێنېرە، پېسە دەماوەندی خەم و تەم مجیان ملشەرە، ناحەقیش نەبېیەن، چونکم هەم کارێ نامۊ هەم بۍ بەشەن جە پەیکان و موژانیش پەی بەردەوامی ناسوری زامەکاش. بېسارانی مەپەرسۊش وەنە، چ کارێش کەردەن؟ مەگەر توشو نەوەشیێ یا ئېشێ بیېنە پاسە پۊژنێنېشەرە؟.
واتش نەخێر، ئېش نېیەن، بەڵکم دیڎۍ من بۍ ڕەحمېنۍ، ۋن مجېنۍ، دڵ و ڕاویارا مەپېکان، ئەر پېسە جارا مەرەخەسېشان کەروون، ئانە هیچ ڕاویارێ بە سڵامەتی بەرنمەشۊن. ئیتر بېسارانیچ زاناش مەعشووقەکېش هەقش بە دەسەن، دیڎۍ و چەمانش بە ئەنقەس بەستەن.
ئارۊ خەمانم چوون دەماوەند بۍ
دیڎەی قیبلەی وېم، بەندی شەوبەند بۍ
واتم ئەی قیبلەم ئیمان و دینم
من بە دیڎەی تۊ، دنیا مەوینم
مەر نەئیشەڵڵا ئېشێ ها تېشدا
پەوکەی شەوبەندت ئاوەردەن پېشدا
واتش بۍ ڕامەن، وە شەڕ شەریکەن
هوونینی، دەردین، ڕاوییار پەیکەن
ئەر مەرەخەس بۊ چوون هەردە جاران
دەییار نمازۊ جە ڕاویاران
منیچ جەو بۊنە مەحبووسم کەردەن
هوونی ناحەقم نەیۊ وە گەردەن
سا زانام ئاخر هەقش بە دەستەن
ڕاویار کۊشەن، ئەنقەسش بەستەن.[1]