هۆرامی واتەن: تەماعە قڼەو پیای دڕۊ

مەگېڵناوە، سەردەمو حەزرەتو عیساینە (س.خ) ، یەرۍ نەفەرۍ هامڕێ وەختو هەرمانکەردەینە گەنجینێ بە قیمەتشان ئېستۆ، دڵشا فرە پەنە وەشبۍ، قەرارشاندا کە نەفەرێشان بلوو واردەشان پەی بارۊن، جمارەو لوا، ڕانە شەیتان خزانە دلۍ دڵیش، پەنەش وات، واردێوە زەهراویشا پەی بەرە، ئاڎۍ مرانەو گردو گەنجینەکەی مەنۊوە پەی وېت، بە گۊشو شەیتانیش کەرد. شەیتان عەینو وەختینە لوانە دڵو دوەکەی تەری کە چەمەڕایۍ واردەی کەرېنۍ، پاسە ڕېکۍ کۊتۍ کە وەختێ هامڕاکەشا گېڵاوە، کۊشاش و گەنجینەکەی مېیانو وېشانە بەشکەران. یەکەمشا گېڵاوەو واردەکەش نېیارە، وەختێ نیشتېرە نان واردەی، پەلامارەشا داو کۊشتشا، دەسشاکەرد نان واردەی، بەڵام نەزاناشا واردەکە زەهراوین، پەوکەی دمای موددێ هەردوۍ مەردۍ.
حەزرەتو عیسای چەنی حەواریەکا پاڵشانە گوزەرشکەرد، بە حەواریەکاش ماچۊ: تەماشەکەردۍ، چەنی هەریەر پیاکە پەی ماڵو دنیێ کوشیێ و هەر یەرېچشا چەنەش بېبەشۍ بیۍ.
هەر چا گوزەرەنە، دوۍ نەفەرۍ یاوێ بە حەزرەتو عیسای، بە پەلە نزیکېش کەوتێ، سەرو پارچە زەمینێ کېشە کۆتەبۍ مېیانشا، هەریۊشا واچی هینو منا، حەزرەتو عیسایچ فەرماواش: بەڵام زەمینەکە چېوێ تەر ماچۊ، واتشا چېش ماچۊ:
فەرماواش زەمینەکە ماچۊ: ئاڎۍ هەردوۍ هینۍ منەنۍ.[1]