#بېسارانی#
ڕۊیێ کوفر دیم، ئیمان مەپۊشا
دڵ، ئیمان بە دەست کوففار فرۊشا
دینی تەرسا گېرت هۊرگېڵا جە گشت
پشت بەست بە زوننار کلیسا و کەنشت
واتم ئەی دڵە، فامت شۊ نە سەر
کۍ بەستەن بە دین کوففاران کەمەر؟
گېرتەنت مەزهەب شېخی سەنعانی
ئیمان مەورەشی زوننار مەسانی
دڵە وات بە خوڎای کارسازی کەریم
من جە دینی تۊ بېزارم، بەریم
ئەڵقېوە جە زوڵف زونناری دڵبەر
نمەڎۆ بە موڵک دارا و ئەسکەندەر
سوب سەدای ناقۇس سەیری بتخانە
دینی تەرسایان، کلیسا یانە
خاستەرەن جە دین ناتەمامی تۊ
سوجدەی ڕېیایی، سوبح و شامی تۊ
[1]