جامەدۊزان
بەشۍ دوەمە

چەنی (دەرزی) مەڕیێ، واچەکۍ مەجنوونیش ئەژنیۍ، کېشاش ئاهی سەرد، واتش: تۊ چووزانی چەی وەر من چەنیم ۋیاران جە لای ئەو دوڵبەر، ماچۊ:
من وەڵتەر چوون لەیلۍ مەیلش چەنیم گەرم بۍ، منش مەدان وە سەر، چەنی هەساران دایېم مەدام شەوق، سینەی سیمینش مەنزڵگام بېیەن، هەرگیز نەدام ڕای نەسیمی سەحەر، جەو یەخەی کەتان بکەرۊ گوزەر، بەڵام ئینە چن وەختەن غەزەب گرتەن لېم، مەیلی جارانش هیچ نەمەندەن پېم، نە تۊی دەرزیدان مەحبووسم کەردەن، ئاواتەواز بیم دایېم وە مەردەن.
دەرزی ئېڎ شنەفت، کېشا ئاهی سەرد
لوورەی هەناسەش جە گەردوون ویەرد
واتش ئەی مەجنوون سادار سەرمەشق
بەدبەختەر جە من، تۊ چە سەودای عەشق
تۊ چیش مەزانی زیندەگیم چەی وەر
چ تەور ویاران جە لای ئه و دوڵبەر
هەتا چەنی بەخت سەعادەت یار بیم
جە لای ئه و نازار دایېم نازار بیم
هەرچی قوماشان کاڵای ئاڵاش بۍ
پارچەی ئەلوانان ئاڵای باڵاش بۍ
یەکسەر گشت وە من دروومان مەکەرد
چوون مەیلش چەنیم نەکەردەبۍ سەرد
گاگا وە‌شاڎی من مەدا وە فەرق
چەنی ستاران دایېم مەڎام بەرق
یەند تەئسیر سۊز مەیلم یاوا پېش
من کەرد وە مەحرەم یەخەی جامەی وېش
چەند ساڵ یەخەی لەیل جەی وەر جام بیەن
سینەی سیمینش مەنزڵگام بیەن
‌‌ شەوقم وە دڵواز شاڎییم وەکۊ بۍ
دەماخم پەرداخ عەتر لیمۊ بۍ
هەرگیز نەدام ڕای نەسیم سەحەر
جه و یەخەی کەتان بکەرۊ گوزەر
ئینە چەند وەختەن غەزەب گرتەن لېم
مەیل جارانش هیچ نەمەندەن پېم
نە تۊی دەرزیدان مەحبووسم کەردەن
سەد جار واستەنم ئاوات پەی مەردەن
دایېم جه و زیندان سیای مەینەت کەیل
نە لەیل مەوینام نە نیم‌ نیگای لەیل
باالله ئەر وە حاڵ دەردم بزانی
مەردەیم وەشتەرەن جەی زیندەگانی
هەنی جەی فیشتەر لېم مەدەر تانە
نەداروون تاقەت ئه و بەندیخانە
تۊ هەم وە باڵاش خەیلێ مەنازی
ڕۊیە هەن ئه و من ئاوات بوازی
ئەر من پۊڵا بیم سەنگم مەشکاوا
تا ئاخر حاڵم وەی جاگە یاوا
تۊ خۊ گۊشت و کەف سەرتاپات هوونەن
پەی سزا و مەینەت جەستەت زەبونەن
ئه و ڕۊ فەنا بای جە ئېشی زامەت
چەنی تۊیچ ماچۊ، هەر وېم سەڵامەت
هەر چەند جە لای لەیل بوڵەند پایەنی
عاقیبەت چوون من کۊتا مایەنی
قاڎر یە دامەن تۊ پەی وېت تەندەن
ڕازان دەرزی گرد پەرېت پەندەن
وېت ۋست نە حەڵقەی توڕدام مەینەت
بۍ سوودەن ئیخلاس یاری بۍ بەینەت.[1]