ناونیشانی بابەت: عومەر درێژ: پەنجا ساڵە خزمەتی هونەر و مەقام دەکەم
عومەر محەمەد، ناسراو بە #عومەر درێژ#، مەقامزانی هەرە دیاری کورد کە لە شاری #کەرکووک# دەژی، لە دیدارێکی (باسکورد) ڕایدەگەیەنێت، مێژووی مەقامی کوردی زۆر کۆنە و کەرکووک و دەشتی گەرمیانیش کۆمەڵێک مەقامی تایبەت بە خۆیان هەیە و باس لەوە دەکات، ئێستاش فێرخوازان فێری مەقامزانی و خوێندنی مەقام دەکات، تەنانەت بانگبێژ و قورئانخوێنەکانیش.
دەربارەی مێژووی مەقامی کوردی لە کەرکووک و دەشتی گەرمیان، عومەر درێژ، وتی: خۆم زیاتر لە پەنجا ساڵە مەقام دەخوێنم و شارەزاییم لێی هەیە، دیارە مەقامی کوردی لە کەرکووک و دەشتی گەرمیان بە مێژوو، واتا بڵێی فڵان ساڵ دیاری ناکرێت، بەڵام ئەوەندە دەزانین مێژوویەکی کۆنی هەیە، ئەوەی کە بیستوومە لە باوکم و لە باپیرەم کە مەقامخوێن بوون، تەنانەت باوکم لە بەرنامەیەکی هونەری لە ساڵی 1988 بەشداریی کردووە و باسی مەقامخوێنەکان دەکات کە هەر هەبوون و کەسانی دیار مەقامخوێن بوون، یەکێک لەوانە باپیری سەڵاح داودە و باوکم کە وەک گوتم خۆیشی مەقامخوێن بوو و 30 ساڵ پێش ئێستا وەفاتی کردووە کە تەمەنی 67 ساڵ بوو و دەیگوت مەقام و مەقام خوێن هەر هەبووە لە کەرکووک.
دەربارەی مەقامەکانی کەرکووک و دەشتی گەرمیانەوە، ئەو مەقامزانە، ئاماژەی بۆ ئەوە کرد، ئەوەی جێی شانازیمانە وەک گەرمیان و کەرکووک، ئەڵڵاوەیسیمان هەیە کە بریتییە لە سێ مەقام؛ نەهاوەند، عەجەم و نەوا، هەروەها قەتار و خاوەکەر هەیە و قەتارەکە بەیاتە و خاوەکەرەکە دەچێتەوە حیجاز و حیجازەکە لە کاتی مەقامخوێنیندا دەبیت ڕادەستی بکەیتەوە بە بەیاتەکە، هەیە ڕادەستی ناکەتەوە و زۆر جار باوکم دەیگوت ئەوەی ئەو دوو مەقامە ڕادەست نەکاتەوە و تێکەڵکێشی نەکات وەکوو خواردنی ترۆزییە بەبێ خوێ و هەروەها مەقامی ئایئایمان هەیە و ئەوەی ڕەسەنایەتی بێت شارۆچکە و مەسنەوییە لە کەرکووک هەمانە کە جێی شانازیمانە.
هاوکات، سەبارەت بەوەی کە لە کەرکووک ناوە ناوە خولی مەقام و مەقامخوێنی بۆ گەنجان دەکاتەوە، عومەر درێژ، وتی: ڕاستە ناوە ناوە ئەو خولانە دەکەمەوە، توانیم کە ژمارەیەکی بەرچاو لە قوتابییان پەروەردە بکەم لە بواری مەقامزانیدا و بەم تەمەنەشەوە هەمیشە هەر حەز دەکەم خزمەت بکەم و دووکانێکی بچووکم هەیە و لە دووکانەکەشم زۆر جار ڕووم تێ دەکەن و پرسیار دەکەن لەبارەی مەقامەوە و ئەوەی لە توانامدا بێت و بیزانم خەڵک فێر دەکەم، هەروەها تەنانەت ئەوانەی بانگ دەدەن و قورئانیش دەخوێنن دێن بۆ لام بۆ ئەوەی شارەزاییان لە مەقامەکان هەبێت.
لە کۆتاییدا دەربارەی ناوەندی عەلی مەردان بۆ مەقام لە کەرکووک، کە ئەو ناوەندە خزمەتێکی زۆری کردووە، عومەر درێژ، ڕایگەیاند: لە ساڵی 2007 پێنج کەس ئەو ناوەندەمان دامەزراند، ئێستا کاک نوورەدین سەرپەرشتیاریی ناوەندەکەیە و زۆر هەوڵ دەدات بۆ ناوەندەکە و ئێستا هەر من و ئەو ماوین و ناوەندەکە ناوەندێکی گرنگی بواری مەقامە لە کەرکووک.[1]
کوردیپێدیا جە دلېنەو ئی بابەتۍ ۋەرپەرس نېیەن، خاۋەنو/خاۋەنۊ بابەتەکۍ ۋەرپەرسیارەن. کوردیپێدیا بە مەبەسو ئەرشیڤکەرڎەی ئی بابەتېشە تۊمارە کەرڎېنە.
ئی بابەتۍ بە زۋانی (کوردیی ناوەڕاست) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
ی کلیک کەرە!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
ئی بابەتۍ 588 جارۍ ۋینیێنە
پەیلۋاو وېت چە بارەو ئی بابەتۍ بنۋیسە!